BAUCAU, 10 juñu 2021 (TATOLI)–Diretór Servisu Saúde Munisipál Baucau, Domingos Reinaldo da Costa Guterres, hateten, tuir oráriu implementasaun vasina AstraZeneca faze daruak iha Baucau sei lansa iha loron 14 juñu 2021.
“Depende vasina to’o mai, tanba ita-nia pedidu ba hotu ona, pedidu ba Ministeiru Saúde (MS) tama ona no sira lori ona, entaun bainhira mai sedu, ita bele realiza duni vasina ne’e tuir oráriu ne’ebé planeia iha Baucau, hahú loron 14 juñu,” Diretór hateten iha ninia knaar fatin, Sentru Saúde Ria-mare Bahu, Baucau kinta ne’e.
Notísia relevante: MS lansa vasina AstraZeneca doze daruak
Tuir Domingos Reinaldo, ekipa saúde sei atende uluk ekipa liña frente ne’ebé hala’o ona vasinasaun iha faze dahuluk, hafoin mak liña frente ne’ebé seidauk vasina, sei vasina kompleta.
Bainhira ramata ona mak kontinua ba kategoria komorbidade (moras komplikadu) inklui idozu hafoin ramata ho komunidade ein jerál.
“Ema hotu sei vasina, maibé la’ós obrigatóriu, tanba ita sei fó vasina ba ema hotu. Karik vasina ne’e iha benefísiu ba ema hirak ne’ebé hetan ona bele konta tutan fali ba seluk ne’ebé seidauk hetan vasina,” nia akresenta.
Nu’udár pesoál saúde, Domingos Reinaldo nafatin fó motivasaun ba komunidade kona-ba benefísiu hosi vasina nu’udár meiu prevensaun COVID-19, tamba kuaze komunidade barak mak seidauk hatene kona-ba vasina, liga mós ba informasaun ne’ebé espalla iha rede sosial.
Antes ne’e, munisípiu Baucau rasik hahú vasina kombate COVID 19 ho tipu AstraZeneca, iha loron 12 abríl 2021, ba ekipa liña frente hamutuk na’in-2.018 no tuir dadus hosi Saúde, daudaun ne’e kategoria komorbidade no idozu iha Baucau hamutuk 21.000.
Jornalista: Natalino Belo
Editora: Julia Chatarina
