DILI, 10 juñu 2021 (TATOLI)-Administradór Munisípiu Aileu, Abel da Conceição, husu ba komunidade Aileu atu labele fiar lia falsu ne’ebé espalla iha rede sosiál Facebook hateten ema simu vasina AstraZeneca vida sei badak.
Notísia Relevante : Populasaun Covalima prontu simu vasina AstraZeneca
“Ha’u husu komunidade Munisípiu Aileu labele fiar lia-bosok ne’ebé espalla iha Facebook hateten, simu vasina AstraZeneca vida sei badak, maibé fiar ba ita-nia Governu tanba laiha nasaun ida hakarak sosa ai-moruk atu estraga ka oho fali nia populasaun,” Abel da Conceição, haktuir ba Agência Tatoli liuhosi telefónika, kinta ne’e.
Atu sensibiliza populasaun Aileu labele monu ba manobra lia-bosok sira-ne’e, ekipa takes force COVID-19 iha Aileu loroloron tama-sai bairru fó avizu ka sosializa informasaun ne’ebé kredivel ba komunidade atu komunidade fiar koopera ho Governu simu vasina AstraZeneca.
Notísia Relevante : PAM Ermera husu Governu kria polítika kombate hoax
Nia hatutan, komunidade tenke fiar Governu simu vasina AstraZeneca tanba informasaun ne’ebé Primeiru-Ministru (PM), Taur Matan Ruak, hateten ona katak sé mak simu vasina AstraZeneca kompletu ka dala-rua, livremente halo sirkulasaun iha territóriu Timor-Leste.
“Husu povu Aileu tomak katak bainhira vasina AstraZeneca ne’e to’o ona ba ita boot sira-nia postu ka suku, hotu-hotu halo favór koopera hakbesik-an ba iha sentru saúde-sira nune’e pesoál saúde sira bele simu fó vasinasaun ba imi. Labele fiar informasaun falsu ne’ebé atu destroi fali polítika Governu nian ne’ebé atu salva povu,” Abel hateten.
Jornalista : Arminda Fonseca
Editór : Francisco Simões
