BAUCAU, 10 juñu 2021 (TATOLI)—Diretór Servisu Saúde Munisipál Baucau, Domingos Reinaldo da Costa Guterres, informa, Forsa Armada Estadu Unidu Amerika (EUA), liuhosi Embaixada iha Timor-Leste, sei konstrui fatin izolamentu rua ba pasiente ho kategoria moderadu COVID-19 iha Baucau.
“Sira (Forsa Amérika) sei mai tau kontentór rua. Monta mak sira tau sasán sira iha laran hodi observa ita-nia kazu sira ne’ebé karik todan, sei atende iha ne’e, aban bainrua se karik moras COVID-19 ne’e hotu, kontentór sei foti fali hodi tau iha HorEX,” Diretór Domingos, informa iha ninia knaar fatin, Ria-mare Bahu, Baucau, kinta ne’e.
Nia dehan, kazu pozitivu iha Baucau sempre aumenta kada loron no fatin ba izolamentu limitadu, entaun bainhira Forsa Amérika sira atu ajuda, bele fasilita kondisiona pasiente.
Kona-ba fatin grave COVID-19 ba inan isin-rua rasik, Ministériu Saúde (MS) hamutuk ho Servisu Saúde Munisipál, deside ona instala iha maternidade Ria-mare Bahu, Baucau.
Iha fatin ketak, Koordenadór Tékniku, Sala Situasaun, Sentru Intergradu Jestaun Krize (CIGC, sigla portugés) Baucau, Salesiano Pinto Fernandes, hateten fatin izolamentu ne’ebé sei konstrui hosi Forsa Amérika iha kuartu 12, inklui kedas ho fatin ba pesoal saúde.
“Hosi diresaun no ospitál, hein de’it bainhira mak implementa, tempu badak sira bele realiza ona, nune’e ita bele utiliza. Bainhira deteta kazu pozitivu mai ospitál ho kategori moderadu, ita bele tau iha ne’ebá, kuandu grave liu mak haruka ba Dili,” Salesitiano akresenta.
Entertantu, planu ajuda fatin izolamentu hosi EUA rasik tuir loloos realiza iha tinan 2020, maibé la konsege, nune’e tuir planu sei establese fali tinan ne’e iha eis Ospitál Tirilolo villa antiga Baucau.
Jornalista: Natalino Belo
Editora: Julia Chatarina
