DILI, 10 juñu 2021 (TATOLI)–Ministériu Obra Públiku (MOP), liuhosi Diresaun Nasionál Aprovizionamentu (DNA), realiza formasaun hanaran ‘Pre-bid training’ durante loron-rua, hahú loron 09 to’o 10 juñu, iha salaun DRBFC, Raikotu, Dili, ba emprezáriu sira hosi munisípiu Aileu ne’ebé atu konkorre iha konkursu projetu estrada rurál ba dezenvolvimentu (ERD).
Iha ámbitu ne’e, Diretór Jerál Administrasaun Finansa (DGAF, sigla portugés) hosi MOP, Januário Patricio Barbosa, hateten, iha tinan ne’e iha projetu pakote neen, tanba ne’e tenke tuir formasaun atubele prienxe rekezitu.
“Objetivu hosi Pre-bid training ne’e, atu hanorin emprezáriu sira oinsá atu prepara dokumentu proposta konkursu públiku ho di’ak bainhira atu kompete iha prosesu konkursu tuir mai,” Diretór Jerál hateten liuhosi nota ne’ebé Agência TATOLI asesu, kinta ne’e.
Notísia relevante: Tinan ne’e, MOP reabilita estrada rurál kilómetru 291 iha territóriu
Nia dehan, orsamentu ne’ebé sei aloka ba projetu estrada rurál iha Aileu hamutuk millaun $2 resin.
Atividade ne’e, iha mós Request for Question (RFQ) ba emprezáriu sira hosi munisípiu Aileu no National Compotety Building (NCB) ne’ebé loke ba públiku nasionál, ne’ebé kualker emprezáriu hosi munisípiu sira bele konkorre.
Tuir nia, projetu pakote neen ne’e ba de’it Aileu-oan maka bele kompete, ne’ebé husu atu emprezáriu sira garante ninia kualidade iha munisípiu Aileu.
“Tanba ne’e maka ami iha hanoin ida katak, antes atu hakat ba konkursu projetu, di’ak liu ita konvida atu fasilita no fó hanoin uluk, saida maka imi (emprezáriu) sente ladi’ak, nune’e maluk téniku sira ne’e bele fasilita imi,” nia fó hanoin.
Tuir planu, semana oin tékniku hosi DNA sei tun ba munsípiu Aileu atu halo koordenasaun ho Diretór Rejionál, Administradór munisipál, atubele loke prosesu konkursu públiku
Entretantu, MOP liuhosi DNA hahú avalia dokumentu konkursu públiku ERD hosi empreza sira iha munisípiu hitu hanesan Baucau, Ainaro, Manatutu, Dili, Manufahi, Lautém no Viqueque.
Notísia relevante: MOP avalia ona dokumentu konkursu públiku estrada rurál munisípiu hitu
Totál empreza lokál ne’ebé partisipa iha konkursu ne’e, kada pokote mínimu empreza haat no másimu na’in-hitu to’o 10.
Pakote estrada rurál hamutuk 13 sei halo iha munisípiu Viqueque, Lautém no Manufahi inklui Dili hamutuk pakote rua.
Totál estrada rurál ne’ebé sei halo reablitasaun no manutensaun iha territóriu laran tomak iha 2021 hamutuk pakote 136, ne’ebé verifikadu hosi Ajénsia Dezenvolvimentu Nasionál (ADN).
Hosi totál ne’e, fundu hosi MOP rasik pakote 67 no hosi Fundu Infrastrutura hamutuk pakote 69,” nia tenik.
Enkuantu, DNA-MOP anúnsia ona empreza manan na’in ba munisípiu Viqueque no Dili.
Notísia relevante: MOP anunsia ona rezultadu konkursu estrada rurál Dili no Viqueque
Abertura formasaun ne’e hosi Administradór minisípiu Aileu, Abel da Conceição no partisipa hosi Diretór Nasionál Estrada Ponte no Kontrolu Cheia (DNEPCC), Nene Lobato, inklui Diretór Obra Públika, Gaspar Amaral.
Jornalista: Florêncio Miranda Ximenes
Editora: Julia Chatarina
