COVALIMA, 10 juñu 2021 (TATOLI)–Administradór Munisípiu Covalima, Francisco de Andrade, hateten presu nesesidade bázika iha Munisípiu Covalima la’o normál nia rasik autoriza negosiante sira halo kompras iha pontu entrada Dili no iha fronteira terrestre Mota-Masin hodi garante presu nesesidade bázika iha merkadu.
Notísia Relevante : Estudante-sira iha Covalima susar akompaña eskola ba uma
“Ami fó autorizadu ba negosiante sosa sasán nesesidade bázika no materiál konstrusaun liuhosi oda-matan rua iha Dili ho mós Mota-Masin. Tanba ne’e, presu sasán nesesidade bázika iha Merkadu Covalima normál,” Francisco de Andrade, hateten hodi responde Agência Tatoli iha edifísiu Administrasaun Munisípiu Covalima, kinta ne’e
Iha Covalima, foos kilograma 25 ho nia presu $13.50 centavo, mezmu nune’e depende ba foos nia kualidade no karik iha manipulasaun ba folin sasán sira, maka ministériu kompetente hamutuk ho autoridade lokal tun direita ba terrenu halo inspesaun no levantamentu.
Foin lais iha Postu Administrativu Fohorem akontese negosiante ida fa’an foos MTCI iha postu presu $13.50 centavo ne’ebé tuir loloos tenke $12.50 centavo no bainhira simu keixa parte relevante halo kedas intervensaun.
Administradór Postu Administrativu Fatululik, Elias da Cruz, mós informa katak presu nesesidade bázika iha Fatululik sei normal no la iha manipulasaun ba sasán folin iha merkadu, liuliu sasán nesesidade bázika.
Jornalista : Celestina Teles
Editór : Francisco Simões
