VIQUEQUE, 10 juñu 2021 (TATOLI)– Vise-prezidente Sentru Integradu Jestaun Krize (SIJK) Munisípiu Viqueque, Francisco de Carvalho, informa, vasina AstraZeneca ba doze dahuluk iha Munisípiu Viqueque hamutuk ema na’in-1.093.
Notísia Relevante : Viqueque kontinua kumpre protokolu prevensaun COVID-19
“Ha’u haree vasina ba doze dahuluk iha Munisípiu Viqueque ema na’in-1.093 mak simu ona, kuaze ema barak mak entuziazmu simu vasina. Maske Governu rasik fó sai vasina iha doze dahuluk la’ós obrigatóriu, maibé populasaun barak mak hakarak hetan vasina,” Vise-prezidente SIJK, Francisco de Carvalho hateten ba Agência Tatoli, iha salaun Administrasaun Munisípiu Viqueque, kinta ne’e.
Antes halo vasina, Francisco esplika, halo promosaun saúde kona-bá vasina nian no pesoál saúde-sira ba hato’o vantajen no dezvantajen hosi vasina hodi populasaun bele komprende benefísiu simu vasina.
Vasina AstraZeneca iha Munisípiu Viqueque atinje 100 % signifika populasaun entuziazmu hakarak hetan vasina iha doze dahuluk. Iha fatin vasina sira iha Munisípiu Viqueque iha pesoál saúde na’in-haat mak fó vasina ba populasaun sira hodi atendimentu.
Jornalista : Vitorino Lopes da Costa
Editór : Francisco Simões
