VIQUQUE, 10 juñu 2021 (TATOLI)– Maske Governu deside hakotu ona serka sanitária ba Munisípiu Viqueque, maibé vise-prezidente Sentru Integradu Jestaun Krize (SIJK) Munisípiu Viqueque, Francisco de Carvalho, kontinua apela atu populasaun Viqueque kontinua kumpre protokolu saúde públiku kona-bá prevensaun COVID-19.
Notísia Relevante : Governu kontinua renova Serka Sanitária iha Baucau no hakotu Viqueque
“Antes ne’e, ami halo sensibilizasaun kona-bá prevensaun COVID-19, maske Governu deside hasai ona serka sanitária ba Munisípiu Viqueque, ha’u nafatin fó hanoin ba komunidade hodi prevene ita ida-ida nia-an tanba saúde iha ita ida-idak nian liman rasik,” diretór saúde Munisípiu Viqueque, Francisco da Carvalho hateten ba Agência Tatoli iha salaun administrasaun Munisípiu Viqueque, kinta ne’e.
Francisco husu ba Viqueque-oan sira iha Viqueque atu mantein distánsia sosiál, keta halibur malu, maske serka sanitária hotu ona, maibé sei nafatin estadu emerjénsia.
“Ita nafatin kumpre regra sira tanba moras ne’e, mai ita la haree ho matan no moras ne’e mai husi ne’ebé ita la hatene,” nia tenik.
Tuir dadus hosi SIJK kazu iha Munisípiu Viqueque kazu detetadu foun hosi oras 24 oras na’in 11, taxa insidénsia pur 52.000 abitante-sira, kazu rekuperadu na’in-tolu (3), kumulativu rekuperadu na’in-139, komulativu kazu konfirmadu na’in-181, óbitu laiha (0) no komulativu óbitu laiha.
Jornalista : Vitorino Lopes da Costa
Editór : Franciso Simões
