BAUCAU, 11 juñu 2021 (TATOLI)–Komunidade suku Buruma, postu admistrativu Baucau villa, munisípiu Baucau, hakfodak ho akontesimentu ema deskoñesidu ‘hakoi’ subar ‘bebe’ iha simteiru Buruma.
Ofisiál Polísia Suku (OPS) Buruma, postu administrativu Baucau villa, Ajente Xefi, Francisco de Jesus Ximenes Silva, haktuir, akontesimentu ne’e iha kuarta (09/06) maizumenus tuku 20:00 liu, iha ema deskoñesidu na’in-rua hakoi hela bebe iha simiteiru Buruma.
“Sira la taka ko’ak ho didi’ak, ikus mai lalar hobur no iha loron kinta (10/06) komunidade deskonfia, tamba atividade hanesan akontese hikas ba dala-rua ona, enkuantu rate ne’e rasik la ho kondisaun dignu tamba deskonfia hakoi ho kondisaun pániku,” Ofisiál OPS informa iha simiteiru Buruma, sesta ne’e.
Notísia relevante: CCLN Baucau husu entidade hotu hamutuk kombate atitude amorál
Francisco konta tuir, labarik (sasin) sira haree ema hakoi kalan no lalaar hobur, hafoin sira foti fatuk taka netik de’it, nune’e horikalan ema na’in-rua deskoñesidu mak mai fali hakoi tan dala-ida.
Tuir nia, bainhira haloot mate, nunka ho kondisaun hanesan ne’e, baibain rai-ko’ak naruk, sunu lilin no kari aifunan, maibé akontesimentu ne’e hanesan pániku.
“Kee oituan de’it hakoi ona. Kuandu abortu, kee rai-koak ho didi’ak hafoin halot, ne’e mai hakoi fali kalan, ita deskonfia dala-ruma sira hasai tiha bebe iha inan-nia isin,” Francisco tenik.
Ajente xefi hateten, nia parte rona informasaun hosi komunidade sira ne’ebé hela besik iha área simiteiru, nune’e direitamente ba fatin akontesimentu hodi observa no informa kedas ba Komandu munisípiu Baucau no to’o kedas iha fatin hodi halo prosesu investigasaun.
Akontesementu ne’e halo komunidade Buruma ne’ebé hela besik simteiru sente hakfodak no deskonfia rezultadu hosi relasaun amorál.
Entertantu, tuir observasaun Jornalista Agência TATOLI iha terrenu, nota katak rai mak taka netik de’it kaixaun modelu kaixa falun ho hena, hafoin iha rate leten iha lilin lolon balun, laiha aifunan no kruz ruma.
Jornalista: Natalino Belo
Editora: Julia Chatarina
