DILI, 11 juñu 2021 (TATOLI)-–Konsultór internasionál ITS Techno JV ho parseiru konsultór lokál MGIEL EIPE unip Lda, hahú aprezenta progresu serbisu estudu polo ka zona dezenvolvimentu ekonómiku dezignadu iha Baucau no Batugade.
Ekipa téknika Ministériu Obra Publika (MOP), kompostu hosi Diresaun Jerál Abitasaun no Urbanizmu (DGHU, sigla portugés), Diresaun Nasionál Edifikasaun (DNE), asesór Gabinete Ministru, tékniku Planeamentu Urbanu no Abitasaun no ekipa téknika hosi Ministériu Planeamentu no Ordenamentu (MPO), hamutuk hamahon-an iha Project Steering Committee (PSC)
“PSC nia papél atu akompaña serbisu konsultór ho rigór, tuir kalendáriu serbisu ne’ebé válidu ba projetu ne’e rasik, ne’ebé mak daudaun tama iha faze relatóriu inísiu tuir rekerimentu termu referénsia no konsiderasaun tékniku sira,” refere nota ne’ebé Agência TATOLI asesu, sesta ne’e.
Aprezentasaun ne’e lidera hosi Diretór kompañia, team leader no péritu sira rasik hosi konsultór internasionál ITS TECHNO JV, ne’ebé halo parseiru ho konsultór lokál MGIEL EIPE UNIP. LDA.
Enkuantu, aprezentasaun ne’e ho maneira direita, ho partisipasaun online hosi péritu sira hosi Indonézia.
Nune’e, Konsultór sei prepara relatóriu progresu serbisu kada fulan, ho durasaun estudu rasik tuir kontratu ne’ebé mak selebra, hodi fó tempu fulan-neen finaliza.
Dezenvolvimentu planu hamosu estudu polo dezenvolvimentu iha área Baucau no Batugade, aliña ho planu estrátejiku (SDP) 2011-2030 no uza referénsia, observasaun prelimináriu no dokumentu sira seluk ne’ebé mak estabelese ona.
Estudu ne’e sei fornese rekomendasaun téknika ba Governu Timor-Leste atu tau ba planu hodi kria zona dezenvolvidu integradu no asegura sustentabilidade ekonómiku inklui aspeitu importante no interligadu sira seluk.
Objetivu hosi projetu ne’e atu identifika potensiál sira ba pontu dezenvolvimentu, indústria esensiál no xave iha área rua ne’e, planu estratéjiku munisipál no formulasaun análiza sira.
“Rezultadu ne’ebé sai espetativa estudu ne’e rasik sei kompostu hosi mapamentu inkluzivu ne’ebé fornese guiaun klaru kona-ba estratejia dezenvolvimentu rejionál no framework, ne’ebé kontetualizadu atu estimula progresu iha nível lokál no rejionál,” nota MOP esplika.
Hosi parte PSC ne’ebé lidera husi Diretór Jerál, Roger Tertuliano Belo, halo esforsu atu revee no avalia serbisu konsultór hodi fó rekomendasaun pertinente atubele asegura kualidade estudu.
Jornalista: Florêncio Miranda Ximenes
Editora: Julia Chatarina
