BAUCAU, 11 juñu 2021 (TATOLI)–Diretór Ministériu Agrikultura no Peska (MAP) munisípiu Baucau, Moises Lobato Pereira, informa, daudaun ne’e servisu pekuária kontinua implementa programa vasinasaun ba animál, hanesan meiu prevensaun moras.
“Ami kontinua halo planu vasinasaun ba animál, liuliu manu, ba kada fulan-tolu. Ami kontinua halo vasinasaun atu ita kontinua prevene manu nia moras no kontinua mós halo prevensaun ba animál seluk hanesan fahi, karau, no bibi,” Diretór ne’e informa iha ninia knaar fatin, Villa nova, Baucau, sesta ne’e.
Nia esplika, durante ne’e ema hotu hatene katak tinan-rua ba kotuk, fahi hetan moras no daudaun ne’e komunidade sira hahú rekupera filafali animál ne’ebé mak durante ne’e mate, liuliu parte tasi ibun nian, hahú hosi postu administrativu Vemase to’o Laga.
Aleinde ne’e, iha área floresta, MAP Baucau foin dadaun hetan apoia hosi Global Organization of Parliamentarians Against Corruption (GOPAC) no daudaun ne’e implenta iha suku sanulu iha munisípiu Baucau.
“Diresaun rasik kada tinan prodús ai-oan 1.000 no ita apoia ba komunidade ne’ebé mak presiza no buka atu asegura fatin seluk ne’ebé mak risku dezastre naturál,” nia akresenta.
Entertantu, planu Orsamentu Jerál Estadu (OJE) 2022, MAP Baucau sei prevee mós verba ba komérsiu atubele akumula produtu, liuliu setór ortikultura, nune’e iha futuru bele loke dalan ba indústria kiik sira.
Jornalista: Natalino Belo
Editora: Julia Chatarina
