VIQUEQUE, 11 juñu 2021 (TATOLI)-Maske Governu termina ona serka sanitária ba Munisípiu Viqueque, maibé seidauk iha desizaun hosi konsellu konsultivu Munisípiu Viqueque atu reativa ensinu aprendizajen iha eskola-sira Viqueque nian.
Notísia Relevante : Governu kontinua renova Serka Sanitária iha Baucau no hakotu Viqueque
Liuhosi enkontru Konsellu Konsultivu Munisípiu ho Sentru Integradu Jestaun Krize (SIJK), ohin, iha salaun Administrasaun Munisipál Viqueque, seidauk hakotu-lia (desizaun) atu reativa ensinu aprendizajen hodi hein fali enkontru tuir mai iha jullu, fulan oin.
“Enkontru entre Konsellu Konsultivu Munisípiu ho hamutuk ho SJIK hodi haree progresu kazu COVID-19 ne’ebé sei kontinua rejista iha Munisípiu Viqueque tanba ne’e seidauk bele deside hodi reativa fali eskola-sira,” prezidente Forsa Tarefa Munisípiu Viqueque atuál Administradór Munisípiu Viqueque, Januario Soares ‘Bolly’ hateten ba Agência Tatoli hafoin enkontru ne’e.
Ekipa servisu SIJK iha munisípiu Viqueque kontinua halo analiza epidemolojia kazu sira ne’ebé sirkula iha Munisípiu Viqueque. Nune’e, bainhira haree kazu COVID-19 redús loos ona maka iha jullu bele reativa eskola-sira.
Iha fatin hanesan diretór saúde Munisípiu Viqueque, Francisco de Carvalho hatutan, kazu COVID -19 mosu iha Viqueque hahú marsu to’o ohin loron rejista kazu pozitivu hamutuk 127 tanba ne’e atu foti desizaun reativa eskola tenke bazeia ba analiza epidemolojia
Jornalista : Vitorino Lopes da Costa
Editór : Francisco Simões
