BAUCAU, 12 juñu 2021 (TATOLI)–Diretór Servisu Saúde Munisípiu Baucau (SSMB), Domingos Reinaldo da Costa Guterres, hateten, hafoin ramata vasina ba ekipa liña frente, sei prioridade vasina ba komunidade kategoria idozu no komorbidade hanesan diabete, tensaun no seluk tan.
“Fulan hirak tuir mai, hafoin vasina liña frente hotu, ita iha kontinuasaun ba sira ne’ebé mak ho komorbidade no idozu,” Diretór ne’e dehan, iha sala apuramentu admistrasaun munisípiu Baucau, Villa nova, sabdu ne’e.
Notísia relevante: Vasina AstraZeneca doze daruak to’o ona Baucau
Tuir Dirijente ne’e, meiu ne’e hanesan parte kampaña vasinasaun iha munisípiu Baucau, atu prevene komunidade sira hosi COVID-19.
Nia hatutan, maski prosesu distribusaun vasina hosi Servisu Autónomu Medikamentu Ekipamentu Saúde (SAMES) sei fazeadamente, maibé SSMB nafatin kontinua halo pedidu atu nune’e bele atende lalais komunidade.
“Agora fila mai ita iha ne’e, oinsá haka’as-an atu serbisu maka’as atende lalais komunidade sira,” nia akresenta.
Domingos garante, vasina ne’e sei bele redús risku kontájiu COVID-19, tanba ne’e Saúde Baucau nafatin fó informasaun ba komunidade atubele halo prevensaun ba an rasik inklui grupu ne’ebé durante ne’e laiha konsiénsia.
“La’ós simu vasina dehan nia bele prevene-an ona, maibé fila ba ema-nia konsiénsia oinsá mak bele hadi’a nia-an,” nia hatutan.
Iha fatin hanesan, Diretora Nasionál armazen no distribuisaun Servisu Autónomu Medikamentu no Ekipametu Saúde (SAMES), Saturlina Ximenes, informa, komunidade ne’ebé seidauk simu vasina sei simu iha faze tuir mai hafoin ramata vasina liña frente.
“Ba komunidade Baucau, ida-ne’ebé mak karik seidauk simu doze dahuluk, sei hein fali iha faze tuir mai, karik semana oin sei iha vasina foun ne’ebé sei iha armazen sentrál SAMES, ami sei distrubui tan,” Saturlina esplika.
Tuir dadus komunidade idozu no komorbidade hamutuk 21.385 mak sei simu vasina faze tuir mai hafoin ramata vasinasaun ba ekipa liña frente hamutuk 2.018.
Meta Saúde Munisipál sei fó vasina ba komunidade iha Baucau hamutuk 30.406 hosi doze 13.220.
Jornalista: Natalino Belo
Editora: Julia Chatarina
