DILI, 14 juñu 2021 (TATOLI)—Ministru Obra Públika, Salvador Eugênio dos Reis Soares Pires, hamutuk ho ekipa hosi Diresaun Jerál Abitasaun Urbanizmu inklui konsultór, aprezenta estudu zona dezenvolvimentu ekonómiku ka polo dezenvolvimentu iha Baucau no Batugade.
“Ida-ne’e hanesan zona eskluzivu dezenvolvimentu, ne’ebé Governu hakarak halo no estudu nia rezultadu hatudu roadmap, tanba ne’e atu ba investimentu, klaru estudu ne’e sei iha rekomendasaun sira hanesan zona indústria no komponente sira ne’ebé mak investe,” Ministru relata hafoin ramata reuniaun ho PM, iha Residénsia Farol, segunda ne’e.
Notísia relevante: Konsultór aprezenta estudu inísiu zona dezenvolvimentu ekonómiku Baucau no Batugade
Tuir Ministru, parte ministériu loke prosesu konkursu ba datoluk mak foin hetan konsultór kualifikadu hodi halo estudu.
“Estudu polo dezenvolvimentu, aban bainrua dokumentu sei fornese roadmap ba Governu halo investimentu iha zona dezignadu hanesan Batugade no Baucau, atu nune’e Governu bele lori dezenvolvimentu besik povu iha rejiaun rua no fó benefísiu investimentu ne’ebé Governu halo ona, aleinde polítika desentralizasaun ne’ebé mak desde Governu anterior to’o agora esforsu hela atu realiza,” nia akresenta.
Aprezentasaun ne’ebé MOP no ekipa aprezenta ba Xefe Governu, foin inisia no relatóriu prelemináriu sei konklui iha novembru 2021.
“Espera katak dokumentu ne’e bele guia ita ba tipu investimentu indústria ne’ebé ita bele halo iha polo dezenvolvimentu área urbana,” Ministru hatutan.
Jornalista: Antónia Gusmão
Editora: Julia Chatarina
