Eskola 5 de maiu hahú foti dadus profesór no funsionáriu atu vasina
DILI, 14 juñu 2021 (TATOLI) – Eskola Ensinu Sekundáriu Jerál 5 de maiu, Becora, Dili, halo ona levantamentu dadus profesór no funsionáriu administrasaun atu prepara simu vasinasaun Sinovac iha tempu besik.
Notísia Relevante : Família estudante 05 maiu kontribui fundus $50.000 konstrui aula foun haat
“Ha’u simu ona vasina, agora ha’u orienta ona adjuntu hahú halo levantamentu dadus profesór no funsionáriu administrasaun iha eskola hodi haruka bá ministériu saúde hodi hetan vasina,” Diretór ESJ 5 de maiu, Becora, Manuel Verdial informa ba Agênsia Tatoli iha eskola 5 de maiu, segunda ne’e.
Nia esplika eskola 5 de maiu reziste profesór hamutuk na’in-52, funsionáriu administrasaun na’in-ida no security na’in-ida maske profesór balun sei iha munisípiu. Maibé sira ne’ebé iha Dili bele foti daudaun ona hodi simu vasina.
Bá sira ne’ebé simu ona vasina parte eskola sei husu aprezenta livru kinur nu’udar evidénsia ida atu garante sira simu ona vasina molok re-ativa hikas aula prejensiál ba estudante sira.
Jornalista : Tomé Amado
Editór : Francisco Simões
