DILI, 14 juñu 2021 (TATOLI) – Ministru Ensinu Superiór Siénsia no Kultura (MESSK), Longuinhos dos Santos, segunda ne’e, realiza kampaña vasina iha Instituisaun Ensinu Superiór Públiku no Privadu-sira (IESPP) ho orientasaun atu re-ativa filafali atividade letiva prezensiál.
Notísia Relevante : Ministru Longuinhos kompleta ona vasina AstraZeneca
“Ami realiza kampaíña vasinasaun iha IESPP-sira ne’e ho intensaun hakarak prevene propagasaun COVID-19 hodi kria kondisaun atu prevene sidadaun ninia moris, liuliu komunidade akadémiku nian iha IESPP nia laran,” Ministru Longuinhos hateten ba jornalista sira depois serimónia vasinasaun iha kampus Universidade Nasionál Timor-Lorosa’e (UNTL).
Ministru Longuinhos husu ba dosente, estudante no funsionáriu iha UNTL labele ta’uk atu simu vasina, tanba MESSK hamutuk ho Ministériu Saúde define ona postu vasinasaun haat ba komunidade akadémiku-sira hanesan iha kampus UNTL, DIT, SEJD ho Asosiasaun Xineza iha TL.
Nia esplika dosente estudante ho funsionáriu iha IESPP-sira bainhira atu hetan vasina tenke ba iha postu vasinasaun ne’ebé termina ona, hahú segunda ne’e. Ba IESPP ne’ebé la pertense iha Munisípiu Dili iha mós oportunidade atu asesu ba postu haat ne’e.
“Ita hakarak konkretiza objetivu ida ne’e hodi asegura maioria dosente, estudante no funsionáriu 67.000 iha IESPP atu partisipa ativamente hodi hetan vasinasaun kompletu,” Longuinhos hateten.
Jornalista : Tomé Amado
Editór : Francisco Simões
