PNTL Covalima kontrola bola-mania sira viola regra serka sanitária
COVALIMA, 14 juñu 2021 (Tatoli) – Polisia Nasionál Timor-Leste (PNTL) Munisípiu Covalima, sei halo kontrolu ba bola-mania sira ne’ebé viola regra serka sanitária hodi halibur-malu asiste jogu EURO 2020 liuhosi transmisaun direita iha televizaun.
Notísia Relevante : PNTL husu komunidade kontinua kumpre protokolu saúde
“Munisípiu Covalima implementa serka sanitária, nune’e Polísia kontinua halo monitorizasaun observa sira ne’ebé mak halibur malu ita sei buka atu halo esplikasaun ba sira, nune’e evita atu halibur malu,” Komandante PNTL Munisípiu Covalima, Superintendente António Maria de Sá, hateten ba jornalista iha Covalima, segunda ne’e
António de Sá husu ba komunidade sira atu kontinua kumpre regra estadu emerjénsia no serka sanitária. Tanba ne’e, tenke evita halibur-malu iha asiste transmisaun Kopa 2020.
“Atu akompaña bola sei iha oportunidade, agora ita tenke fó prioridade ba situasaun pandemia COVID-19 hodi bele kore-an hosi peste letál ne’e,” António de Sá tenik.
Nia dehan, bainhira abitante-sira kontinua la kumpre regra serka sanitária, PNTL sei notifika no aplika tuir lei.
Jornalista : Celestina Teles
Editór : Francisco Simões
