DILI, 15 juñu 2021 (TATOLI)- Organizasaun Forum Karidade Humanista Timor-Leste (FKHTL), halo uma ba oan-kiak feto na’in-rua iha Aldeia Naroman, Suku Madohi, Postu Administrativu Don Aleixo, Munisípiu Dili.
Prezidente komisaun organizadora FKHTL, Belarmino da Costa Marques hateten, objetivu sira ajuda oan-kiak na’in-rua ne’e tanba sira na’in-rua mesak feto de’it, hela uma ne’ebé kondisaun ladi’ak ona, nune’e sobu tiha halo foun fila-fali.
“Situasaun ne’ebé ohin loron ita enfrenta liuliu alin feto oan-kiak na’in-rua ne’ebé inan-aman mate kleur ona, sira-rua moris mesak de’it, bin foin tinan 18 no alin tinan ualu (8), moris mesak durante tinan haat ona hela uma ne’ebé kondisaun aat, entaun ami rona informasaun mai halo levantamentu ikus mai ami halo uma ba sira tanba ho sentimentu hanesan umanu,” Belarmino da Costa Marques hateten ba Agência Tatoli iha Sede Suku Madohi, tersa ne’e.
Nia afirma, apoiu uma ne’ebé daudaun sira halo finansia la’ós hosi FKHTL maibé apoiu hosi ema laran luak sira hodi sosa fali materiál konstrusaun halo uma.
“Ita tane liman ba ema hotu-hotu tanba FKHTL hanesan organizasaun ida ne’ebé mak voluntáriu mai hosi estudante no juventude laiha finanseiru no laiha mós materiál, rekursu umanu ami iha maibé rekursu finanseiru ami la iha, entaun ami husu ema-nia apoiu mak ami halo,” nia hateten.
Daudaun ne’e apoiu finanseiru ne’ebé sira hetan ona hamutuk $900 hosi pesoál balu, NGO nasionál balu, inklui partidu polítiku balu hosi sosa daudaun ona materiál konstrusaun uma nian hahú halo ona hanesan halo fundasaun no hada bloku.
“Uma ne’ebé daudaun ami halo ne’e nia medida 6m×6m, kuartu rua, sala vizita ida, no sala han ida. Estimasaun osan ne’ebé presiza ne’e hamutuk $ 2.855,” nia esplika.
Iha fatin hanesan, oan kiak, Fernanda da Costa Rangel hateten, nia ho alin fó agradese tebes ba grupu FKHTL nia laran luak inklui juventude Madohi, tanba dezde sira-nia apa-ama mate sira-rua moris mesak ho uma ne’ebé kondisaun la di’ak.
“Ha’u laiha liafuan ne’ebé barak atu hato’o ba apoiu sira ne’ebé daudaun ne’e ha’u ho ha’u-nia alin hetan, maibé ami rua iha de’it liafuan agradese,” Fernanda da Costa Rangel hateten.
Durante FKHTL eziste halo ona uma hamutuk ualu, inklui daudaun halo hela oan-kiak feto na’in-rua iha Suku Madohi. Apoiu uma ne’ebé FKHTL halo iha kategoria tolu hanesan, oan kiak, faluk no liuliu ema vulneravel-sira.
Jornalista : Arminda Fonseca
Editór : Francisco Simões
