iklan

EKONOMIA, MUNISÍPIU, VIQUEQUE

Produtu lokál iha Uatulari la folin

Produtu lokál iha Uatulari la folin

Komunidade nia atividade iha Merkadu tradisionál Darabai, Uatulari, Viqueque. Imajen Tatoli/Vitorino Lopes da Costa

VIQUEQUE, 14 juñu 2021 (TATOLI)-Serka sanitária no konfinamentu obrigatóriu ho estadu emerjénsia ne’ebé aplika iha Munisípiu Viqueque durante ne’e fó implikasaun negativa ba rendimentu ekonomia povu ki’ik sira nian.

Produtu lokál ne’ebé povu ki’ik sira foti hosi sira-nia to’os ka kintál ba fa’an iha merkadu laiha folin to’o balun tutur ka leba fila-fali de’it mai uma hodi han no balun fó han fahi.

“Ami to’os-na’in difisil tebes atu hetan osan iha situasaun serka sanitária ne’e. Produtu lokál ne’ebé ami lori ba merkadu la folin ona,” Agusta Feca Pinto, nu’udar negosiante produtu lokál haktuir ba Agência Tatoli iha merkadu tradisionál Darabai, Uatulari, Viqueque, sábadu (13/06).

Nia hateten, dala-ruma sira lori modo tahan ka ai-manas tasak, ai-dila funan ho ai-dila fuan ba fa’an iha merkadu to’o loraik laiha ema ida sosa. Ho nune’e, atu lori fila ba uma mós ladún di’ak,  tanba ne’e tenke buka meiu troka de’it ona ho liis ka troka ho masin no troka ho nesesidade seluk.

Agosta Feca Pinto, hateten, iha implementasaun estadu emerjénsia no serka sanitária iha Viqueque hahú  maiu nia-laran ekipa saúde no autoridade-sira bandu makaas negosiante-sira  halo atividade negósiu.

Nia subliña, semana ida fa’an dala-rua iha kuarta no sábadu, maibé ema sosa mak laiha liu, dala ruma ema mai sosa $1.00 no $2.00 ne’e sorte boot ona.

“Ami hakarak maka COVID-19 hotu lalais atu ami bele hadi’a ami nia ekonomia uma laran. agora ami susar tebes,”  nia tenik.

Jornalista       : Vitorino Lopes da Costa
Editór             : Francisco Simões

 

iklan
iklan

Leave a Reply

iklan
error: Content is protected !!