BAUCAU, 15 juñu 2021 (TATOLI)—Tribunál Distritál Baucau (TDB) deside adia prosesu julgamentu ba Konselleiru Másimu Partidu Kmanek Haburas Unidade Nasionál Timor-oan (KHUNTO), inisiál JdSNB, tanba razaun seidauk iha karta notifikasaun hosi Tribunál Distritál Dili (TDD).
JdSNB rasik deskonfia envolve iha kazu obstrusaun ba autoridade públiku iha loron 02 maiu 2018, munisípiu Lautém ne’ebé rejista iha TDB ho númeru Nuc 0039/18.
Aleinde ne’e, pedidu arguidu liuhosi karta ne’ebé hato’o ba TDB, razaun la marka prezensa iha julgamentu tanba hanesan membru Konsellu Estadu, nune’e presiza halo reuniaun hodi deside levantamentu imunidade.
Nune’e, TDB rasik seidauk halo apresiasaun hasoru pedidu arguidu nian relasiona ho pedidu levantamentu imunidade tamba sei hein notifikasaun hosi TDD.
TDB rasik deside prosesu julgamentu adia fali ba loron tersa, 27 jullu 2021, tuku 14:30.
Durante fó sai adiamentu, prezide hosi Juíz Titulár José Escurial, Ministériu Públiku (MP) reprezenta hosi Bartolomeu de Araújo, enkuantu Advogadu Privadu, Ismael Assunção Lopes, Americo Martins no Arnaldo da Costa Lopes, no arguidu JdSNB rasik la marka prezensa.
Jornalista : Natalino Belo
Editora : Julia Chatarina