Website Protesaun Konsumidór permite reklama servisu operadór telekomunikasaun
DILI, 15 juñu 2021(TATOLI)—Ministériu Transporte no Komunikasaun (MTK) no Autoridade Nasionál Komunikasaun (ANC, sigla portugés) halo lansamentu Website Gabinete Protesaun Konsumidór http://anc.tl/consumer no formuláriu reklamasaun.
Tuir Prezidente ANC, João Olívio Freitas, plataforma ne’e hodi bele proteje direitu konsumidór hasoru servisu operadór telekomunikasaun no kompañia fornesedór servisu internet.
“Konsumidór sira iha direitu utiliza servisu ne’ebé maka sira sosa, faze dahuluk sira halo reklamasaun direta ba operadór sira atubele fó solusaun,” Prezidente ANC, João Olívio Freitas, hateten iha salaun ANC, Caicoli, tersa ne’e.
Liuhosi plataforma online ne’e, bainhira konsumidór sira infrenta problema hasoru operadór, sira iha direitu atu kontesta iha loron 15 nia laran via online
“Bainhira konsumidór la satisfaz, bele tama website ne’e hodi prenxe formuláriu ne’ebé maka iha, nune’e autoridade bele komunika ho operadór hodi buka solusaun,” nia akresenta.
Formuláriu reklamasaun http://anc.tl/media/2021/06/Consumer-Complaint-Form, hodi bele tulun no proteje konsumidór sira.
“Formuláriu ida-ne’e konsumidór sira bele asesu iha website ANC, ne’ebé lansa ona no ami tau tipu balun hodi reklama lamentasaun ba asuntu ne’ebé konsunidór sira konsidera katak operadór bosok sira liuhosi mensajen sira ne’ebé dala barak manda ba telefone,” nia hatutan.
João Olívio Freitas konsidera plataforma ne’e bele fasilita di’ak liután atendimentu operadór sira ba kliente sira.
Iha sorin seluk, Ministru Transporte Komunikasaun, José Agustinho da Silva, hateten, kliente tenke hetan nia direitu, nune’e iha sentimentu satifaz ho atendimentu operadór sira.
“Atu haree andamentu operadór no kliente iha korelarasaun atendimentu di’ak, maka iha orgaun reguladór hanesan ANC, ne’ebé asegura no observa katak atendimentu ba kliente tenke di’ak,” governante ne’e subliña.
Seremónia ne’e partisipa mós hosi Ministru Asuntu Parlamentár no Komunikasaun Sosiál, Francisco Jerónimo, inklui reprezentante operadór telekomunikasaun tolu hanesan Timor Telecom, Telemor no Telekomcel.
Jornalista : Natalino Costa
Editora : Julia Chatarina
