DILI, 16 juñu 2021 (TATOLI)–Governu liuhosi reuniaun Konsellu Ministru (KM), iha kuarta ne’e, aprova Projetu Rezolusaun Governu, hodi nomea Prezidente Autoridade Bobonaro no Ermera no Administradór munisípiu Liquiçá no Manatuto.
Projetu Rezolusaun Governu ne’e aprezenta hosi Ministru Administrasaun Estatál, Miguel Pereira de Carvalho.
“Nomeadu haat ne’e sei hala’o funsaun ba períodu tinan lima, konta hosi loron simu pose nian,” Ministru Prezidénsia Konsellu Ministru, Fidelis Manuel Leite Magalhães, informa hafoin reuniaun ezekutivu iha salaun auditóriu Ministériu Finansa.
Rezolusaun Governu ne’e, nomea Ernesto de Oliveira Barreto, nu’udár Prezidente Autoridade munisípiu Bobonaro no Eusébio Salsinha, hanesan Prezidente Autoridade munisípiu Ermera.
Enkuantu, Pedro Paulo Gomes, hanesan Administradór munisípiu Liquiçá no Bernardo Lopes, hanesan Administradór munisípiu Manatuto.
Jornalista: Antónia Gusmão
Editora: Julia Chatarina
