VIQUEQUE, 16 juñu 2021 (TATOLI)- Ekipa Programa Nasionál Dezenvolvimentu Suku (PNDS), kuarta ne’e, halo sensibilizasaun kona-bá implementasaun fundu ba Reziliénsia Komunitáriu no Rekuperasaun Ekonomia (RKRE) ba autoridade lokál sira iha Munisípiu Viqueque.
Notísia Relevante : PNDS benefisia komunidade Uaitame
Diretór PNDS Munisípiu Viqueque, Estevão de Carvalho, esplika RKRE nu’udar fundu adisionál ba projetu infraestrutura komunitária, ne’ebé apoiu hosi Governu Austrália ba Governu Timor-Leste liuhusi PNDS.
Fundu ne’e hodi responde ba krize ekonomia ne’ebé impaktu hosi pandemia COVID-19. Nune’e RKRE nia objetivu mak atu apoiu Governu Timor-Leste nia esforsu ba rekuperasaun ekonomia komunidade iha Timor-Leste.
Estevão hatutan, iha sékulu (I) ne’e implementa tinan 2019 no agora tama ba iha sékulu (II) hodi simu proposta iha Postu Administrativu Ossu ho Uatoucarbau no sei alarga tan ba Postu Administrativu Uatulari.
Nia esplika progresu implementasaun sikulu (I) ba fundu RKRE ninia progresu ne’e haree iha suku tolu hosi postu Ossu; Suku Liaruka no Uaibobo no Postu Administrativu Uatucarbau maka Suku Batata mak seidauk implementa programa ne’e.
Atividade ba programa ne’e maka hadi’a estrada iha suku laran, bee-moos no estrada rurál, maibé seidauk implementa tanba sei haree ba kondisaun estrada ne’ebé oras ne’e aat hela hosi sékulu (I).
Totál fundu ba implementa programa RKRE 2021 ho montante $656.300.83, alokasaun ba Postu tolu no totál suku 22, hosi postu Ossu, suku sanulu (10) mak hanesan, Suku Builale $31,899.69, Suku Builo ($25,846.93), Liaruca ($28,791.52), Loi-Humo ($22,902.34), Nahareca ($31,899.69), Ossorua ($25,846.93), Ossu de Cima ($32,063.28), Uabubo ($28,955.11), Uaguia ($28,791.52) no Suku Uaibobo ($25,846.93).
Postu Administrativu Uatolari ba suku neen (6) hanesan Suku Afaloicai ($28,999.72), Babulo ($31,825.33), Macadique ($31,825.33), Matahoi ($28,999.72), Uaitame ($28,999.72) no suku Vessoru ($26,174.11).
Postu Uatucarbau iha suku neen (6), hanesan Afaloicai ($34,844.28), Bahatata ($31,736.10), Irabin de Baixo ($34,844.28), Irabin de Cima ($31,736.10), Loi Ulu ($31,736.10), Uani-Uma ($31,736.10).
RKRE faze daruak ne’e sei hahú iha jullu 2021 no sei termina iha 31 dezembru 2023, bainhira fundu sira ne’e transfere hotu ona ba iha konta bankária suku nian.
Administradór Munisípiu Viqueque, Januario Soares “Bolly” husu ba xefe suku sira tenke kontrola ba implementasaun fundu RKRE atu programa ne’ebé implementa iha suku bele la’o ho di’ak.
“Apoiu ne’ebé mai hosi Governu sentrál liuhosi PNDS fó mai ita ne’e xefe suku sira tenke responsavel hodi implementa iha suku bele la’o di’ak,” Januario Soares “Bolly” hateten.
Jornalista : Vitorino Lopes da Costa
Editór : Francisco Simões
