Semana ida, PNTL rejista kazu krime 52 iha territóriu tomak

DILI, 16 juñu 2021 (TATOLI)—Durante semana ida, hahú hosi 07 to’o 15 juñu, Polísia Nasionál Timor-Leste (PNTL), rejista kazu asalta-malu entre grupu joven iha munisípiu hotu-hotu hamutuk 52.

Portatavóz Komandu Jerál PNTL, Superintendente Xefe, Arnaldo de Araújo, esplika hosi númeru kazu ne’ebé iha, kazu asalta-malu iha 20, mate ida, tuda-malu rua, baku-malu tolu, ameasa-malu haat, na’ok sasán ida, ema lanu todan ida, tara-an ida, estraga sasán uma laran ida, problema disputa rai ida, no kazu violénsia doméstika 17.

Notísia relevante:Maiu, PNTL Dili rejista kazu krime 151

“PNTL kontinua hala’o seguransa másimu iha munsípiu-sira, hodi evita no redús númeru kazu asalta-malu entre grupu joven iha munisípiu-sira,” Superintendente Xefe, Arnaldo de Araújo, hateten ba jornalista-sira iha Komandu Jerál, Caicoli, kuarta ne’e.

Alende kazu krime, PNTL mós rejista kazu asidente tráfegu hamutuk 17 ne’ebé sofre kanek kamán no na’in-lima kanek todan.

PNTL halo analiza ba asidente hirak-ne’e akontese 100% kauza hosi fatór umanu no kondús transporte la kontrola an inklui lanu todan.

Atu evita asidente hirak-ne’e, Komandu Jerál PNTL kontinua alerta ba membru-sira halo kontrolu másimu ba movimentu transporte iha munisípiu hotu-hotu.

Jornalista: Eugénio Pereira

Editór: Cipriano Colo