MANATUTO, 17 juñu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo hala’o lansamentu ba vasina AstraZeneca doze daruak ba liña frente no doze dahuluk ba idozu ho komorbilidade-sira iha postu administrativu Laleia, munisípiu Manatuto.
“Lansamentu ne’e atu ita-nia maluk-sira ne’ebé serbisu iha liña frente, kompleta vasina hodi bele sirkula livre no la presiza autorizasaun no teste swab,” Francisco Jerónimo, hateten ba jornalista-sira iha administrasaun postu administartivu Laleia, kinta ne’e.
Notísia relevante:Governu simu ona doasaun AstraZeneca doze 294.800
Governante ne’e esplika, bainhira simu ona vasina dala rua, pesoál liña frente-sira ne’ebé hala’o serbisu Estadu-nian, tenke la’o livre.
“Vasina ne’e mós fó ba ema hotu-hotu ne’ebé la’ós obrigatóriu, maibé hanesan sidadaun atu kontribui tenki vasina, hodi hasa’e imunidade ba protesaun hosi COVID-19,” Francisco Jerónimo, subliña.
Iha fatin hanesan administradór munisípiu Manatuto, Fernando Junior da Silva, enkoraza komunidade Laleia, atu simu vasina AstraZeneca, tanba ho vasina mak bele prevene an hosi peste COVID-19.
”Ha’u husu ba inan aman-sira la bele rona buatus oin-oin kona-bá vasina, tanba vasina ne’e seguru no di’ak hodi proteje ita nia an, proteje família hosi COVID-19,” Fernando Junior da Silva husu.
Entretantu, pesoál liña frente hosi postu administrativu Laleia, ne’ebé simu ona vasina doze dahuluk no prepara atu simu doze daruak hamutuk na’in 31.
Partisipa iha lansamentu ne’e, reprezentante UNICEF iha Timor-Leste, Diretora Jerál Prestasaun Serbisu Saúde, Diretor Nasionál Diseminasaun Informasaun, Administradór Postu Administrativu Laleia, Diretór Serbisu Saúde Munisípiu Manatuto, Komadante Polísia Eskuadra Laleia, komunidade relijiozu, inklui komunidade Laleia.
Jornalista: Felicidade Ximenes
Editór: Cipriano Colo
