VIQUEQUE, 18 juñu 2021 (TATOLI)-Pandemia COVID-19 ne’ebé obriga Estadu aplika Estadu emerjénsia, serka sanitária no konfinamentu domisiliáriu, dala ua’in hamosu protestu oioin no espetativa oioin.
Notísia Relevante : Liña frente iha Lacluta simu ona vasina kompletu
Balun dehan COVID-19 ho aplikasaun Estadu emerjénsia, serka sanitária no konfinamentu domisiliáriu ne’e fó impaktu negativu ba rendimentu ekonomia uma-laran nian to’o prejudika ema la bele asesu ba ai-han. Maibé, ba komunidade Postu Administrativu Lacluta, Munisípiu Viqueque, pandemia COVID-19 ne’e lori aspetu pozitivu, tanba família-sira halibur-malu (la sai ba fatin ida) no organiza malu tama natar no halo to’os hodi hasa’e produsaun agríkola iha Lacluta.
“Dezde pandemia COVID-19, estadu emerjénsia, serka sanitaria no konfinamentu obrigatóriu ne’ebé aplika iha territóriu nasionál, kuaze populasaun no estudante sira iha Lacluta foku halo to’os no natar. Balun ba kuda hare, kuda fore no kuda batar hodi hasa’e produsaun,” Administradór Postu Lacluta, José de Andrade dos Santos, hateten ba Agência Tatoli iha Viqueque, sesta ne’e.
José de Andrade dos Santos dehan, vantajen hosi Estadu emerjénsia no serka sanitária maka funsionáriu ho estudante-sira la tama servisu no la tama eskola. Ho nune’e, sira konsentra ba halai natar no halo to’os.
“Ida ne’e kondisaun real iha Postu Administrativu Lacluta. Karik Agência Tatoli aban bain-rua bele ba vizita ami hodi haree direta kondisaun Lacluta nian. Tanba iha Lacluta agora daudaun produsaun agríkola sa’e maka’as, hanesan hare, ai-dila, batar, hudi no ai-farina,” nia haktuir.
Jornalista : Vitorino Lopes da Costa
Editór : Francisco Simões
