COVALIMA, 18 juñu 2021 (Tatoli) – Xefe Suku Raimea, Postu Administrativu Zumalai, Munisípiu Covalima, Januário Gomes Nahak, husu ba Governu atu destaka operadór ekipa pezadu permanente iha Covalima atu bele atende servisu emerjénsia ruma bainhira akontese dezastre naturál.
‘“Governu tenke tau operadór permanente iha Munisípiu Covalima tanba ami nia komunidade enfrenta dezastre difisil atu kontaktu,” Januário Gomes Nahak, aprezenta kestaun ne’e ba Ministru Agrikultura no Peska (MAP), Pedro Reis, sesta ne’e, bainhira koleta hare nakroma ektare 80 Aldeia Oebaba, Covalima.
Ministru Agrikultura no Peska (MAP) Pedro Reis, responde hodi dehan, MAP rasik iha operadór, maibé situasaun pandemia COVID-19 ne’e halo ema hotu kumpre hela serka sanitária iha ida-idak nia uma.
“Ita tenke tau ita nia operadór iha ne’e,” Ministru Pedro Reis hateten hodi fó mós solusaun katak presiza duni rekruta operadór Covalima-oan atu bele hela permanente iha Covalima, nune’e bele atende servisu emerjénsia ruma, liuliu iha situasaun dezastre naturál.
Jornalista : Celestina Teles
Editór : Francisco Simões
