VIQUEQUE, 18 juñu 2021 (TATOLI)-Komunidade Suku Laline ho Suku Ahic, Postu Administrativu Lacluta, Munisípiu Viqueque, dezde 2002 to’o agora seidauk asesu eletrisidade. Nune’e, iha tempu kalan, sira sunu de’it lilin, lampu uza mina-rai ho petromax.
Notísia Relevante : Aspetu pozitivu hosi pandemia COVID-19 iha Lacluta
Administradór Postu Lacluta, José de Andrade dos Santos, hateten durante ne’e komunidade hamutuk 400-resin iha suku rua-ne’e susar tebe-tebes iha tempu kalan tanba sira la asesu eletrisidade.
“Ha’u ko’alia ona ho autoridade EDTL munisípiu Viqueque no nasionál no ha’u mós hato’o ona proposta dezde 2015, maibé to’o agora seidauk iha resposta ruma hosi Governu sentrál ba preokupasaun komunidade nian la asesu eletrisidade,” José de Andrade dos Santos hateten ba Agência Tatoli iha Viqueque, sesta ne’e.
Kona-ba estrada, nia husu, Governu hadi’a ponte tanba ponte sira ne’ebé impaktu hosi dezastre naturál iha loron 04 abríl liubá, estragu hotu no prejudika komunidade atu haku’ur mota iha tempu udan.
“Ami-nia estrada aat mak barak no ponte Welolo hetan estragu iha abríl liubá to’o agora seidauk hadi’a,” José de Andrade dos Santos hateten .
Nia dehan, postu administrativu Lacluta presiza konstrusaun ponte lima tanba tempu bai-loron ne’e sei di’ak, maibé tama ba tempu udan difikulta tebes ba populasaun sira nian movimentu liuliu agrikultór-sira lori produtu ba merkadu.
Jornalista : Vitorino Lopes da Costa
Editór : Francisco Simões
