COVALIMA, 18 juñu 2021 (Tatoli)- Ministru Agrikultura no Peska (MAP), Pedro Reis, hamutuk ho korpu diplomátiku-sira no autoridade lokál iha Covalima, sesta ne’e, koleta hare nakroma ektare 80 iha Aldeia Oebaba, Suku Raimea, Postu Administrativu Zumalai, Munisípiu Covalima.
“Zumalai sai ezemplu atu hanorin ita-nia inan-aman agrikultór-sira hatoman án uza adubu orgániku POC Nassa ho nia rezultadu maka hanesan agora ami koleta ne’e,” Ministru MAP Pedro Reis, hateten ba jornalista bainhira remata koleta hare ektare 80 ne’e.
MAP sei halo aproximasaun hodi hakbesik ba agrikultór-sira hodi hasa’e produsaun iha rai-laran. Ministru Pedro Reis tenik, MAP sei koordena ho ministériu relevante atu prevee osan hodi sosa hare ne’ebé agrikultór-sira prodús atu bele motiva agrikultór-sira ona kontinua hala’o sira-nia atividade tanba Governu iha osan atu sosa.
Iha biban ne’e, reprezentante Administradór Covalima, Jacinto dos Santos, hato’o sira-nia apresiasaun ba Governu liuliu MAP ne’ebé bele koleta hare ektare 80 iha Aldeia Oebaba.
Nia husu ba komunidade atu kontinua hasa’e produsaun, nune’e iha futuru Governu sei tau matan di’ak liu tan.
Jornalista : Celestina Teles
Editór : Francisco Simões
