VIQUEQUE, 21 juñu 2021 (TATOLI)-Autoridade Munisípiu Viqueque, kompostu hosi xefe suku, xefe aldeia, Polísia Nasionál Timor-Leste hamutuk ho pesoál saúde-sira kontinua halo sensibilizasaun kona-bá protokolu prevensaun COVID-19 ba komunidade-sira.
Notísia Relevante : Viqueque kontinua kumpre protokolu prevensaun COVID-19
Komandante PNTL Munisípiu Viqueque, Superintendente Sebastião Alves Quintão, informa sira nia parte ho parte relevante-sira kontinua tama-sai bairru no aldeia-sira hodi halo sensibilizasaun kona-bá protokolu prevensaun COVID-19 ba komunidade, maske Governu hakotu ona konfinamentu obrigatóriu.
Protokolu prevensaun COVID-19 tuir padraun Ministériu Saúde (MS) no Organizasaun Mundiál Saúde (OMS) nian, maka uza máskara bainhira sai hosi uma ba fatin seluk, fase-liman beibeik ho sabaun ka uza dezinfetante no evita halibur malu.
“Pandemia COVID-19 sai ona preokupasaun global no seidauk iha ai-moruk atu bele kura, tanba ne’e, ema hotu tenke kuida-an hodi kumpre protokolu saúde públiku. Importante liu ba ita-nia inan-aman terseira idade,” Sebastião Alves Quintão, hateten ba Agência Tatoli iha Suku Uma Uain Leten, Viqueque, segunda ne’e.
Maske Viqueque hakotu ona serka sanitária, maibé kazu COVID-19 kontinua rejista. Kazu pozitivu detetadu foun iha oras 24 nia laran ikus laiha (-), taxa insidénsia pur 100.000l abitante 1,3, kazu rekuperadu iha oras 24 nia laran ikus iha na’in-neen (6), kazu ativu na’in-19, akumulativu rekuperativu na’in-175 no komulativu kazu konfirmadu na’in-194.
Jornalista : Vitorino Lopes da Costa
Editór : Francisco Simões
