OÉ-CUSSE, 21 juñu 2021 (TATOLI)—Prezidente Autoridade (PA) Rejiaun Administrátiva Espesiál Oé-Cusse Ambeno (RAEOA), Arsénio Paixão Bano, segunda ne’e hala’o vizita traballu hodi haree konstrusaun projetu kuarentena iha Portu I Wao Kitahara Mahata ne’ebé nia progresu fíziku atinji ona 65%
“Objetivu hosi vizita traballu ida-ne’e atu observa diretamente progresu konstrusaun karantina provizóriu iha Portu Kitahara Mahata ho totál kuartu 48 no bele akomoda ema na’in-192. Agora daudauk ninia konstrusaun físiku atinje ona 65%,” Arsénio Paixão Bano informa ba Agência Tatoli, via WhatsApp, segunda ne’e.
Bazea ba planu no programa prevensaun COVID-19 iha RAEOA, autoridade servisu makaas hodi halo prevensaun ba surtu COVID-19 ne’e hodi prepara kondisaun iha pontu entrada hotu-hotu iha Oé-Cusse hodi akomoda pasajeiru sira, hodi evita transmisaun lokál iha RAEOA.
Iha sorin seluk, Diretór Empreza Lifau Indah Unipesoál, Fernando Mak, promete iha fulan rua (2) tan nia parte sei finaliza obra nee, nune’e bele entrega ona ba autoridade hodi uza kuarentena ne’e iha tempu badak nia laran
“Projetu ne’e tenke ramata iha fulan rua (2) nia laran tanba ekipamentu no sasán sira-ne’e kompletu. Nia progresu servisu ne’e hela de’it 35% atu ramata ona, depois entrega ba autoridade RAEOA,” Fernando Mak hateten.
Entretantu projetu kontrusaun kuarentena ne’e konstrui hosi Empreza Lifau Indah Unipesoáliha portu I Wao Kitahara Mahata, aldeia Mahata, suku Costa, sub-rejiaun Pante Makasar. Kuarentena ne’e fahe ba uma tolu mak kada uma ida, ho nia medida naruk metru 51, luan meyru 10, durasaun kontratu fulan rua (2) ho kustu totál $407. 000
Jornalista : Abilio Elo Nini
Editór : Cancio Ximenes
