DILI, 21 juñu 2021 (TATOLI)—Koordenadór Ekipa Traballu Tékniku ba Identifikasaun Infraestrutura no Ekipamentu Públiku Koletivu, Benjamin Hopffer Martins, segunda ne’e, relata progresu serbisu ekipa ba Primeiru-Ministru (PM), Taur Matan Ruak.
“Primeiru-Ministru bolu ha’u atu relata serbisu sira-ne’ebé maka entrega mai ha’u atu koordena no enkoraaa nafatin ba ami atu fó solusaun ba dezastre naturál foin lalais akontese ne’ebé estraga infraestrutura públika barak,” Koordenadór hateten, hafoin reuniaun ho PM iha Rezidénsia Ofisiál Farol.
Ekipa traballu fahe maneira identifikasaun estragu dezastre naturál iha fulan-abríl ba nível tolu.
“Nível dahuluk halo limpeza ba estragu sira no prosesu hotu, agora iha prosesu pagamentu, nível daruak iha projetu ualu, ne’ebé ida mak estrada Embaixada Japaun nia oin ne’ebé finaliza ona no projetu haat tan kona-ba ponte sira iha Dili laran, ne’ebé Konsellu Administrasaun Fundu Infraestrutura (KAFI) mós aprova ona no hein lori ba prosesu aprovizionamentu,” nia informa.
Notísia relevante: Hahú aban, transporte bele asesu ona estrada Embaixada Japaun oin
Nune’e mós, projetu ida iha ponte CPLP ninia barazen nia sorin, tanba ninia kondisaun jeométrikamente ultrapasa altura ba-mai kuaze metru 12, maka solusaun téknika ne’e sei iha prosesu estuda hela no besik ramata.
Kona-ba ponte Bekussi, iha hela prosesu dezeñu hodi bele rezolve problema no Ponte Loes (Liquiçá) ne’e tanba ninia komplesidade ne’e boot maka ekipa tékniku sira sei halo dezeñu.
Iha nível datoluk nian sei identifika problema barak iha Dili laran no iha munisípiu hanesan Manatuto, Liquiçá, Bobonaro no parte Kosta Súl, ne’ebé sei identifika hela fatin hodi halo dezeñu ba infraestrutura sira ne’ebé a’at.
“Dadus sira-ne’e iha relasaun ho tékniku, tanba ne’e sei avalia ba estragu no hosi dadus sira ne’e mak fó solusaun téknika tuir estragu sira-ne’ebé mak iha. Produtu ne’e Ministériu Obra Públika nian, hafoin aprezenta ba Ajénsia Dezenvolvimentu Nasionál (AND) hotu mak foin lori ba prosesu aprovizionamentu,” nia hatutan.
Jornalista : Antónia Gusmão
Editora : Julia Chatarina
