VIQUEQUE, 21 juñu 2021 (TATOLI)-Komandu Polísia Nasionál Timor-Leste (PNTL) Munisípiu Viqueque, segunda ne’e, distribui apoiu nesesidade bázika ba kbiit-laek hamutuk uma-kain 15 iha Suku Uma Uain Leten, Postu Administrativu Viqueque Vila, Munisípiu Viqueque.
Notísia Relevante : Autoridade-sira kontinua sensibiliza protokolu prevensaun COVID-19
Komandante PNTL Munisípiu Viqueque, Superintendente Sebastião Alves Quintão, hateten apoiu nesesidade báziku ne’e bazeia ba proposta hosi autoridade Suku Uma Uain Leten ba komandu PNTL Munisípiu Viqueque.
Apoiu nesesidade bázika ne’ebé komandu PNTL Viqueque distribui ne’e hetan hosi parseiru The Asia Foundation, maibé momentu ne’ebá iha proposta husu apoiu solár panel hodi tulun avó sira ne’ebé hela iha area remotas. Maibé, parseiru-sira tetu katak kustu solar panel gastu boot, nune’e sira apoiu mak nesesidade bázika.
Iha fatin hanesan Xefe Suku Uma Uain Leten, Martino Soares Gusmão, hato’o agradese ba komandu PNTL ne’ebé fó ona apoia nesesidade bázika ba abitante kbiit-laek uma-kain 15 tanba sira ne’e kbiit la iha hodi sustenta sira-nia moris.
Apoiu nesesidade bázika ne’ebé benefisiáriu-sira simu mak hanesan, foos, mina bimoli, sabaun, pastadente, shampoo, ikan lata, sasán protesaun máskara no kolesaun ida no lona ida.
Jornalista : Vitorino Lopes da Costa
Editór : Francisco Simões
