DILI, 21 juñu 2021 (TATOLI)–Governu liuhosi Sekretaria Estadu Ambiente (SEA) hamutuk ho United Nations Development Programme (UNDP) introdús brigada hamutuk 200 atu proteje no salva guarda ambiente ho voluntáriamente iha Timor-Leste.
Sekretáriu Estadu Ambiente, Deométrio do Amaral do Carvalho, informa, brigadista hirak ne’e sei halo protesaun ba floresta, re-florestasaun nasionál, kombate ambientál urbanu, kontrola ambiente hanesan sunu rai, soe lixu no atividade seluk ne’ebé bele estraga ambiente.
“Ami serbisu hamutuk ho UNDP halo lansamentu ba brigadista ambientál sira hamutuk 200 hodi halo serbisu no hamoos filafali tasi-ibun, kuda fali ai-oan iha fatin balun ne’ebé hetan dezgreasaun hosi efeitu dezastre naturál iha loron 04 abríl,” Sekretáriu Estadu hateten hafoin seremónia introdusaun brigadista sira, iha Jardín Largo, Lecidere, segunda ne’e.
Brigadista ne’ebé maioria jovern ne’e, ho espíritu rasik atu halo asaun di’ak ba ambiente saudável.
SEA fó tempu loron 22 ba brigadista sira atu hamoos no kuda ai-oan sira hodi garante ambiente moos no saudável.
“Ami iha kompromisu atu serbisu ho brigadista sira iha Timór laran tomak, hanesan serbisu voluntáriu ba defesa ambiente,” nia akresenta.
Nune’e, SEA enkoraja ba joven tomak atu uza espasu brigada ambientál ba kapasitasaun no espasu ba komprende ambientál no halo asaun ba ambiente ne’ebé fó benefísiu ba sira no Timor-Leste.
“Ita espera joven ohin loron iha korajen atu serbisu proteje ita-nia ambiente,” nian enkoraja.
Brigadista ambientál sei foku ba área hanesan foho pilotu lima atu kuda ai-oan hodi sai verde no halo limpeza ba lixu sira iha tasi ibun.
“Ami-nia Alvu brigadista hamutuk 400-resin iha kapitál Dili, maibé ohin kuaze 200-resin mak partisipa,” nia akresenta.
Iha biban hanesan, Reprezentate Residénsia UNDP iha Timor-Leste, Lazima Ota-Bhatta, hateten, programa brigadista ambientál hanesan programa ne’ebé serbisu ba komunidade no hamutuk serví komunidade.
“Ami-nia apoia foku ba brigadista sira hamutuk 500 hodi responde no proteje ambiente, liuliu efeitu dezastre naturál loron 04 abríl,” nia dehan.
SEA no UNDP koopera atu benefisia brigada ambientál sira liuhosi atividade ne’ebé envolve serbisu hamutuk ho Ministériu Administrasaun Estatál no Sekretáriu Estadu Profesionál no Empregu (SEFOPE), no entidade relevante.
Programa brigada ambientál no programa seluk tan hetan apoia finanseiru hosi Banku Dezenvolvimentu Aziátiku (ADB, sigla inglés), Governu Japaun, Governu Koreia inklui UNDP hamutuk millaun $1 atu fó serbisu imediata ba iha joven sira, ho kada loron $5 iha fatin ne’ebé identifikadu atu kuda ai no hamoos lixu.
Jornalista : Florencio Miranda Ximenes
Editora : Julia Chatarina
