Hamutuk ho CVTL hakmán sofrimentu umanu
DILI, 22 juñu 2021 (TATOLI)—Cruz Vermelha Timor-Leste (CVTL) kompleta ona ezisténsia ba dala 21 (XXI) iha nasaun ne’e, ho reflesaun ba aniversáriu ne’e maka, hamutuk ho CVTL hakmán sofrimentu umanu.
Prezidente CVTL, Madalena Hanjam, iha komemorasaun ezisténsia ne’e hateten, hahú kedan iha tinan 1975 CVTL hala’o ona serbisu iha funu laran no kontinua avansa ba serbisu iha tempu Indonézia no post independénsia to’o ohin loron tama ona ba tinan XXI ba serbisu umanitáriu foka ba família-sira ne’ebé mukit no vulnerável liu.
Notísia relevante:CVTL komemora loron mundiál Krús Vermella ho tema “Hamutuk Ita La Para”
“Haree ba situasaun dezenvolvimentu, CVTL hanesan auxíliu ba Governu. Nune’e, bainhira iha lakuna CVTL tenki ajuda populasaun iha tempu inundasaun ka emerjénisa nia laran,” Madalena Hanjam, hateten ba jornalista-sira iha Bairru Formoza, tersa ne’e.
Atividade CVTL barak tebes, tanba ne’e voluntáriu sira hala’o atividade profisionál, atividdae jerál hanesan halo uma, dada bee moos, fó asisténsia médika, fó asisténsia enfermajen, asisténsia nutrisaun, juventude-sira halo primeiru sokoru, entaun atividade hirak-ne’e mós la’o nafatin.
Membru CVTL to’o oras ne’e hamutuk 2.000 ho voluntáriu hamutuk 6.000 no membru ativu hamutuk 200.
COVID-19, CVTL rekruta profisionál saúde 400
Madalena Hanjam mós informa katak, durante perúdu COVID-19, CVTL rekruta profisionál saúde hamutuk 400 hdi apoia ospitalár-sira.
Rekrutamentu ne’e tanba ospitál-sira presiza tebes atu apoia serbisu ne’e rasik, nune’e CVTL deside hodi halo rekrutamentu ba médiku, enfermeiru, tékniku aliadu no voluntáriu balun atu bele ajuda halo uma ba kbiit laek sira.
Durante ne’e, parseiru ne’ebé CVTL besik liu maka banku de sangue tanba oferese ran ba ospitál-sira ne’ebé mak presiza.
Iha fatin hanesan Sekretáriu Estadu Komunikasaun Sosiál (SEKOMS), Merício Juvinál dos Reis Akara, agradese ba kontribuisaun hosi CVTL desde inísiu to’o ohin loron hodi halo intervensaun iha terrenu bainhira situasaun difísil.
“Bainhira mosu inundasaun, membru Governu sira seidauk to’o CVTL to’o uluk ona. Entaun, CVTL iha esperiénsia boot liu kompara ho instituisaun sira seluk. Tanba ne’e, agradese ba kontribuisaun,’’ Mericio Juvinál dos Reis Akara, hateten.
Governu sei kontinua apoia CVTL bazeia ba lei ne’ebé konsidera katak, CVTL hanesan parseiru estratéjiku iha área umanitária.
Jornalista: Felicidade Ximenes
Editór: Cipriano Colo
