COVALIMA, 23 juñu 2021(TATOLI) – Abitante na’in-37 hosi Suku Lalawa, Postu Administrativu Tilomar, Munisípiu Covalima, sente kontente tanba sira-nia ai-an ne’ebé kuda folin ona tanba Centro Comunidade Covalima (CCC) sosa kada ai-oan ho folin $0.50 centavos.
“Ami halo pagamentu ba to’os na’in-37 ne’ebé ami sosa sira-nia ai-oan hun 8.000-resin ho osan $4.120,” diretór CCC, Alberto de Jesus Barros, haktuir ba jornalista iha Suku Lalawa, kuarta ne’e.
CCC husu ba to’os na’in sira atu kontinua koopera no serbisu hamutuk ekipa hosi CCC nune’e bele kontinua kuda ai-oan iha Postu Tilomar.
Programa sosa ai-an ne’e nia prosesu hahú kedas iha 2017 no nia implementasaun iha 2019 ne’ebé hetan suporta finanseiru hosi Uniaun Europeia, Oxfam Austrália no Fiends of Suai Covalima no apoiu tékniku hosi fundasaun Xpand
Área implementasaun programa Ho Musan ida (HMI) Rai Matak Covalima iha Postu Administrativu Tolimar, Suku Lalawa iha Aldeia Britis, Halimea, Kota foun no Tula Eduk no Iha Suku Beiseuk, Aldeia Baer, Suku Casabauc iha Aldeia Tabolo .
Objetivu hosi HMI Rai Matak Covalima atu dezenvolve komunidade nia moris iha área rural liu hosi atividade reflorestasaun iha área degradasaun, kria armazén ba karbonu liu hosi kuda ai-horis.
To’os na’in, Juscelino da Silva, hateten, durante ne’e sira kuda ai-mahoni no nia kontente tanba CCC sosa sira-nia ai-horis hodi fó rendimentu ba sira iha tempu pandemia COVID-19.
Administradór Munisípiu Covalima, Francisco de Andrade hato’o agradese ba to’os na’in sira no mós ba CCC hodi halo esforsu hodi kuda ai-oan no konserva fatin sira ne’ebé poténsia ba rai monu ho kuda ai-oan halo barak.
“Ha’u hanoin ai-oan mahoni ne’e tama iha kategoria ho presu ne’ebé as, maibé iha Covalima CCC fahe ai-oan ho gratuita pois ita kuda no sira sosa fali,” Francisco de Andrade hateten.
Tuir planu CCC sei kontinua kuda ai-oan iha Postu Administrativu Fatululik ho Fatimea.
Jornalista : Celestina Teles
Editór : Francisco Simões
