DILI, 23 juñu 2021 (TATOLI)—Ministériu Interiór (MI), fó ona orientasaun ba Diresaun Nasionál Prevensaun Konflitu Komunitária (DNPKK), ho Komandu Polísia Munisípiu Bobonaro, organiza diálogu ba dame hodi solusiona konflitu ne’ebé akontese iha área Maumali, aldeia Samelaun, suku Ritabou, postu administrativu Maliana Vila, munisípiu Bobonaro.
Diretór DNPKK, António Viegas, esplika konflitu ne’ebé akontese hodi hamate matebian Costódio de Fátima Pascoal iha 07 juñu halo populasaun to’o agora tuur la hakmatek, tanba grupu balun kontinua halo ameasa-malu.
Notísia relevante:Ema deskoñesidu baku Custódio, mate iha HNGV
Nune’e, DNPKK sei uza mekanizmu tolu hanesan, prevensaun problema labele mosu, segundu bainhira problema mosu duni karik oinsá buka solusaun hodi hatene problema labele sai boot no terseiru bainhira problema boot ona karik, sei buka solusaun oinsá mak rezolve atu labele akontese tan iha futuru.
“Agora daudaun ita nia ekipa ba ona halo aprosimasaun ho família no komunidade atu tuur hamutuk hodi buka solusaun, tanba agora hein de’it desizaun nune’e ami bele hakbesik an atu buka solusaun ba,” António Viegas hateten ba jornalista-sira iha Ministériu Interiór, Vila-Verde, kuarta ne’e.
Kona-ba data loloos atu hala’o diálogu, Diretór ne’e seidauk bele fó-sai, tanba sei hein pontu fokál DNPKK iha Bobonaro ne’ebé sei koordena ho autoridade suku Ritabou, grupu joventude no veteran-sira hodi ajuda solusiona konflitu ne’e.
Nia hatutan, PNTL mós to’o agora sei kontinua halo investigasaun ba autór-sira ne’ebé deskonfia envolve iha kazu ne’e, sei prosesa tuir lei.
Antes ne’e, Xefe Suku Ritabou, Maximiano dos Sanstos, informa sira-nia parte prontu koopera ho DNPKK atu organiza diálogu ba dame ho komunidade.
Jornalista: Eugénio Pereira
Editór: Cipriano Colo
