DILI, 23 juñu 2021 (TATOLI)- Adjuntu Prezidente Country Coordinating Mechanism (CCM) Timor-Leste, Filipe da Costa, hateten ezekusaun fundu CCM nian ba siklu 2021-2023 ne’ebé Timor-Leste simu ona doasaun husi Fundu Global hamutuk $88.683.797 dezde 2003 to’o 2021 no transfere ona mai Timor-Leste hamutuk $81.126.661, maibé foin ezekuta de’it ho valór $74.969.037 iha tinan 18-nia laran.
Notísia Relevante : CCM apoiu millaun $8.3 ba MS kombate tubercoluze
Filipe da Costa, haktuir lia hirak ne’e bainhira hamutuk ho Vise-Ministru Saúde (MS), Bonifácio Mau Coli dos Reis, halo fiskalizasaun konjunta ba Sentru Saúde, Munisípiu Ermera, kuarta ne’e, hodi haree oinsá implementasaun hosi Fundu Global dahuluk nian ba moras malária, tuberkuloze no HIV/SIDA.
“Hosi figura orsamentu ne’e hatudu katak ita-nia ezekusaun la másimu no ita transfere fila ba konta bankária Fundu Global hamutuk $6.157.624 iha siklu pasadu 2003 to’o 2020. Tanba ne’e, iha fiskalizasaun ba siklu tinan ida-ne’e, CCM enkoraja Ministériu Saúde Timor-Leste nu’udar resipiente prinsipál atu mellora liután progresu serbisu liu-liu ba moras malária, tuberkuloze, HIV/SIDA, no kompleta fasilidade Sentru Saúde-sira tenke ho di’ak,” Filipe da Costa hateten iha komunikadu imprensa ne’ebé Agência Tatoli asesu, kuarta ne’e.
Siklu orsamentu ba 2021 to’o 2023, Fundu Global aloka tan mai Timor-Leste hamutuk millaun $15.7 ba moras tolu; malaria, HIV/SIDA no tuberkulozu, no tinan ida-ne’e haree ezekusaun la’o di’ak tebes tanba hahú inísiu janeiru to’o juñu, Ministériu Saúde ho nia sub-resipiente sira ezekuta ona fundu ne’e hamutuk $3.900 543.
“Pontu importante ezekusaun orsamentu iha tinan dahuluk 2021 atinje liu 90% mak Timor-Leste bele aplika tan fundu adisionál millaun $7. Tanba ne’e, fiskalizasaun konjuntu ho Ministru Saúde esensiál tebes atu ita bele enkoraja malu hodi atinje persentajen ne’ebé define ona, no fiskalizasaun konjuntu ne’e mós atu ministériu ho nia sub-resipiente sira serbisu pro-ativu liután hodi hetan progresu ezekusaun iha futuru,” Filipe da Costa esplika.
Liuhosi komunikadu imprensa ne’e, Vise-Ministru Saúde Bonifácio Mau Coli dos Reis, hateten, fiskalizasaun konjuntu ne’ebé hala’o hosi CCM no Ministériu Saúde ne’e importante tebes atu identifika problema sira ne’ebé parseiru implementadór, inklui sosiedade sivíl sira hasoru iha terrenu.
“Fiskalizasaun ne’e importante tebes tanba ami vizita ba sentru no postu saúde sira hodi haree direta implementasaun programa malária, tuberkuloze no HIV/SIDA hodi avalia sira-nia progresu, dezafiu no solusaun sira rápida hodi atinje persentajen ne’ebé define ona husi CCM,” Bonifácio Mau Coli dos Reis hateten.
Nia enkoraja ba ofisiál saúde no parseiru implementadór sira ba oin orsamentu ne’ebé hetan apoiu hosi Fundu Global ne’e tenke halo kampaña maka’as hodi redús no prevene HIV/SIDA, tuberkulozu no malaria iha siklu tinan tolu oin mai (2021-2023).
CCM hanesan komité nasionál ne’ebé haruka pedidu finansiamentu ba Fundu Global, no reprezenta nasaun hodi superviziona ba fundu no mós CCM mak parseria xave-prinsipál ba Fundu Global.
Jornalista : Arminda Fonseca
Editór : Francisco Simões
