OÉ-CUSSE, 23 Juñu 2021 (TATOLI)—Ministériu Obra Públika liu-hosi Dirasaun Infraestrutura iha Rejiaun Administrátiva Espesiál Oé-Cusse Ambeno (RAEOA) aloka ona rihun $42 atu mellora estrada foun kilómetru ualu (8) iha sub-rejiaun Oésilo.
“Iha tinan 2021, ita iha planu atu halo melloramentu tan ba estrada foun kilómetru ualu (8) iha sub-rejiaun Oésilo hosi aldeia Buqui, bairru Bitopa, suku Usitasae ba aldeia Oé-Baha, bairru Paut, suku Bobometo, ho nia orsamentu ita prevee tiha ona hamutuk rihun $42,” Diretór Obrás Públika RAEOA, Kandido dos Reis Amarál, informa ba Agência TATOLI, iha nia servisu fatin, bairru Santa Rosa, Oé-Cusse, kuarta ne’e
Importante tebes atu loke estrada iha área sira-ne’ebé besik fronteira, tanba ne’e mak Dirasaun Infraestrutura liu-hosi servisu estrada aprezenta ona ba Prezidente Autoridade RAEOA no iha tempu badak sei implementa.
Bainhira udan monu rai, nia dehan, komunidade hili dalan altertnativa liuhosi dalan aldeia Sonamnasi, suku Cunha, tanba liuhosi estrada Bitopa ne’e risku boot ba komunidade tanba mota boot no naruk tebes.
“Entaun ita hili estrada foun Bitopa tun ba Oé-Baha tanba mezmu udan monu rai maibe sirkulasaun komunidade bele livre hosi perigu. Bainhira estrada ne’e ramata, iha faze segundu, ita mós atu halo Ponte ida iha Bitopa. Ne’e pakote ona,” nia dehan
Aliende ne’e, dirasaun infraestrutura sei loke mós estrada alternativa foun kilómetru haat (4) iha Pante Makasar hosi bairru Oétulu, suku Costa ba Padiae, suku Lalisuk, nu’udár alternativa seluk tanba la kleur-tan konstrusaun postu F-FDTL nian mós sei funsiona iha Sikone foho tutun, nune’e autoridade tenke hahú iha planu ba estrada foun ne’e.
Dirasaun Infraestrutura la’ós halo de’it ba servisu ne’ebé propoin iha OJE 2021 nian, maibé dirasaun ne’e liuhosi unidade ekipamentu mós halo ona servisu tuir pedidu sira-ne’ebé maihosi komunidade ho ninia klasifikasaun urjente.
Dirasaun Infraestrutura sempre halo maneira no jestaun ba tempu, nune’e iha tinan ida-ne’e (2021) la’ós hala’o de’it servisu ba situasaun emerjénsia maibé foku mós ba servisu ne’ebé tau ona osan ba tinan 2021 ne’e.
Diretór Obrás Públika ne’e informa, iha ezekusaun Orsamente Jerál Estadu (OJE) 2020 nian, Dirasaun Infraestrutura tutela direta ba Gabinete Prezidente Autoridade, konsege mellora estrada kilómetru 4.200, hosi aldeia Kusi, suku Ban-Afi, sub-rejiaun Nitibe ba suku Malelat, sub-rejiaun Pasabe ho nia kustu operasaun ba obra ne’e rihun $27 inklui uza ba kombustivel, hahan, operadór sira nomós ba manutensaun.
Jornalista : Abilio Elo Nini
Editór : Cancio Ximenes
