BAUCAU, 24 juñu 2021 (TATOLI)–Jerente programa To’os ba Moris Di’ak (TOMAK) munisípiu Baucau, Isac Ribeiro Ximenes, garante bele redús númeru má nutrisaun iha munisípiu Baucau.
“Ha’u garante bele redús má nutrisaun tamba TOMAK serbisu hamutuk ho Ministériu Agrikultura no Peska (MAP) no Ministériu Saúde (MS) kona-ba sensível ba nutrisaun, hanesan parte ida iha programa agrikultura no saúde rasik, planu ne’e hosi ministériu no TOMAK ajuda implementa programa ministériu. Ha’u fiar no garante bele kontribui ba kestaun pozitivu durante tinan 10 laran,” Jerente programa ne’e hateten iha edifísiu postu admistrativu Baucau, kinta ne’e.
Bazeia ba informasaun hosi MS iha postu Baucau, má nutrisaun sei sa’e tanba ema-nia kuñesimentu ba konsumu ai-han nutritivu menus.
“Kuñesimentu sira mak seidauk iha, liuhosi TOMAK maski la redús totalmente maibé bele hamenus,” nia akresenta.
Hosi totál dadus hosi MS, TOMAK nia kontribuisaun hodi hamenus má nutrisaun hamutuk 5% iha postu Baucau villa.
Aleinde ne’e, demográfiku tinan 2016 hatudu katak labarik na’in-ida hosi na’in-haat (24%) menus hosi tinan 5 sofre má nutrasaun.
Jornalista : Natalino Belo
Editora : Julia Chatarina
