OÉ-CUSSE, 25 Juñu 2021 (TATOLI)—Prezidente Autoridade Rejiaun Administrátivu Espesiál Oé-Cusse Ambeno (RAEOA), Arsénio Paixão Bano, sesta ne’e ensera distribuisaun cesta bázika iha suku Lifau, sub-rejiaun Pante Makasar ba benefisiáriu 3.588.
Notísia Relevante: Benefisiáriu 86,97% iha RAEOA simu ona cesta básika
“Inan-aman sira iha suku Lifau, ohin, imi mak ikus ba simu cesta bázika iha Oé-Cusse. Husu imi atu aproveita ai-han sira ne’e, sukat iha imi idak-idak nia família rasik, labele faan ai-han sira ne’e iha merkadu,” Arsénio Paixão Bano, hatoo lia hirak ne’e iha serimónia enseramentu ne’ebé hala’o iha sede suku Lifau.
Autoridade RAEOA ne’e hato’o agradesiemntu ba ekipa distribuisaun cesta bázika ne’ebé organiza hosi membru autoridade sira, tanba fulan rua hamutuk ho komunidade iha suku no aldeia atu distribui ai-han ba sira.
Nia mós fó parabens ba agrikultór sira, tanba agrikutór sira-nia partisipasaun hodi faan sira-nia karau 500-resin ba autoridade hodi distribui na’an ba populasaun hamutuk 85.649 ne’ebé hela namkari iha sub-rejiaun, suku no aldeia iha RAEOA ne’e
Iha fatin hanesan, Xefe Suku Lifau, Crisanto Colo, agradese ba autoridade RAEOA maske simu ikus maibé ho esforsu tomak to’o hetan solusaun ba cesta bázika hodi tula hosi Dili mai Oé-Cusse, nune’e komunidade bele simu no ensera iha suku Lifau.
Entretantu Koordenadór Cesta Bázika RAEOA, Maximiano Neno, klarifika katak distribuisaun cesta bázika ne’e hahú iha 26 marsu to’o 25 juñu 2021 ne’e, distribuisaun kuaze la’o di’ak maske akontese fallansu iha suku mak balun simu uluk no balu tarde maibé suku hotu-hotu hetan ona.
“Impedimentu prinsipál ne’ebé mak ekipa cesta bázika hasoru mak relasiona ho situasaun COVID-19, serka sanitária iha Dili, nune’e movimentu transporte máritima la’o ladun di’ak. Ró la-halo viajen normál hanesan babain, nune’e kompañia sira-ne’ebé sai fornesedór cesta bázika enfrenta problema atu transporta sasán sira mai Oé-Cusse, tanba ne’e mak ita atraza,” nia dehan.
Nune’e Koordenadór Cesta Bázika ne’e apela ba reklamante no aldeia lima (5) seluk ne’ebé sedauk simu cesta bázika, autoridade promete no sei distribui tan iha semana oin, nune’e RAEOA bele atinje 100%.
Entretantu totál benefisiariu ba cesta bázika iha suku Lifau hamutuk 3.588, kompostu hosi aldeia tolu (3) mak hanesan aldeia Nefobai 1,171, aldeia Oémolo 1,035, no aldeia Tulaika iha benefisíariu hamutuk 1,382.
Totál enjerál totál uma kain iha RAEOA 20.098 ho totál benefisiáriu 85.649, no benefisiáriu sira-ne’ebé simu ona cesta bázika hamutuk 74.493 (86.97%).
Notísia Relevante: Governu prevee millaun $4 ba implementasaun Cesta Bázika iha RAEOA
Jornalista : Abilio Elo Nini
Editór : Cancio Ximenes
