DILI, 25 juñu 2021 (TATOLI)—Xefe Divizaun Formasaun Konsellu Nasionál Juventude Timor-Leste (CNJTL, sigla postugés), Zaulino da Silva Ximenes, hateten atu reativa fali fornasaun nia parte hein desizaun hosi Governu liu-liu Ministériu Edukasaun, Juventude no Desportu (MEJD) bainhira mak deside reativa ensinu aprendizajen ba eskola sira iha territóriu nasionál.
“Governu loke ona konfinamentu obrigatóriu no atividade ensinu aprendizajen komesa la’o fali ona, entaun divizaun formasaun iha CNJTL ne’e mós hakarak reativa fali atividade formasaun ne’e,” Zaulino da Silva Ximenes hateten ba Agênsia Tatoli, iha nia kna’ar fatin, Palpaco, Díli, sesta ne’e.
Nia informa, iha tinan 2021 ne’e formandu sira-ne’ebé mai tuir formasaun hamutuk na’in-25 ne’e mai tuir formasaun iha área lian Inglés, maibé estadu emerjénsia no serka sanitaria entaun atividade balun redús tiha.
Divizaun Formasaun Konsellu Nasionál Juventude Timor-Leste (CNJTL, sigla postugés) ne’e harii iha tinan 2012, ne’ebé inisiativa ne’e maihosi Prezidente Konsellu Nasionál Juventude Timor-Leste (CNJTL), Leovigildo da Costa Hornai, hamutuk ho voluntáriu na’in-haat (4) ho objetivu hakarak fahe esperênsia ne’ebé iha ba joven sira liu-liu ba joven kbiit laek sira ho gratutita.
Liutiha tinan rua, iha tinan 2014, kursu ne’e hahú selu tanbá iha momentu ne’ebá Divizaun Formasaun presiza orsamentu ba administrasaun nian, maibé selu ho kustu $5 no iha 2018 to’o agora nia kustu aumenta ba $15.
Entretantu, área formasaun ne’ebé estabelese iha tinan 2012 hanesan lian Inglés, iha 2014-2018 aumenta tan ho lian Português no Komputadór, hafoin iha 2019 to’o 2020 aumenta ho Administrasaun, Finansas, LSBE (Life Skill base of Education) no Edukasaun Sívika.
Formandu ne’ebé tuir formasaun iha Divizaun Formasaun CNJTL nian ne’e hahú hosi 2012 to’o 2020 hamutuk 2.118, no hosi númeru ne’e feto na;in-1.159 no mane na’in-959, ne’ebé maiória maihosi povu ai-leba nia oan no estudante balun.
Jornalista : Nelia Fernandes
Editór : Cancio Ximenes
