DILI, 25 juñu 2021 (TATOLI)—Sekretária Estadu Igualdade no Inkluzaun (SEII) liuhosi Sentru Empoderamentu ba Igualdade no Inkluzaun Sosiál (SEIIS) munisipál durante ne’e halo formasaun empoderamentu ekonómiku no partisipasaun feto iha polítika ba grupu benefisiáriu feto iha munisípiu sira, konsege promove grupu negósiu 10 rejista iha SERVE,IP.
Sekretária Estadu Igualdade Inkluzaun (SEII), Maria José da Fonseca Monteiro de Jesus, hateten iha tinan kotuk SEEI halo servisu maka’as no susesu tanba bele empodera grupu negósiu feto sira-ne’ebé eziste iha munisípiu konsege rejista sira-nia empreza iha Servisu ba Rejistrasaun no Verifikasaun Emprezariál (SERVE, sigla portugés).
“Ita susesu tanba grupu barak mak rejistu ona iha SERVE,IP. Ida-ne’e tanba ita servisu no esforsu fó formasaun kona-ba sosiu ekonómiku no oinsá halo negósiu ba ita-nia grupu feto iha munisípiu sira liuhosi ekipa SEIIS munisipál. Nune’e, tinan kotuk, ita-nia grupu negósiu 10 mak konsege rejistu ona,” Maria José da Fonseca Monteiro de Jesus hateten ba Agência Tatoli iha nia servisu fatin, Obrigado Barack, Dili, sesta ne’e.
Grupu negósiu 10 ne’e, grupu tolu (3) hosi Manatuto ne’ebé sira-nia atividade loke restaurante mak grupu grupu Difranole, Esperança no Maun-alin, no grupu negósiu ida (1) hosi Liquiça mak Bermutuh ho atividade homan no prodús kripik.
Iha Lautem, SEII promove grupu negósiu tolu (3) ho sira-nia atividade loke alfaiate mak Grupu Hadomi Defisiénsia, Grupu Feto Faluk no grupu RIKFEM, no grupu negósiu ida (1) iha Dili ne’ebé hala’o atividade loke restaurante mak Grupu Haburas.
Entretantu, munisípiu Baucau iha grupu ida (1) hanaran Modesta Conceição agora sai hanesan empreza Unipessoal LDA, no munisípiu Bobonaro iha grupu rua (2) mak Feto Forte Nasaun Forte ho Atividade fó Moris.
Grupu negósiu 10 ne’e hahú rejistu iha SERVE,IP iha tinan 2017-2020, tanba SEII ho nia ekipa Sentru Empoderamentu ba Igualdade no Inkluzaun Sosiál Inkluzaun (SEIIS) iha munisípiu fó formsaun ba grupu hirak ne’e iha progressu no susesu, nune’e SEII nia parte kontinua halo esforsu hotu-hotu hodi fasilita informasaun ba grupu sira.
Jornalista : Osória Marques
Editór : Cancio Ximenes
