COVALIMA, 25 juñu 2021 (TATOLI) –Kazu omisídiu ne’ebé rezulta administradór postu administrativu Zumalai, Santiago Barreto, mate iha loron 13 fevereiru 2019, to’o agora seidauk iha justisa.
Notísia Relevante : Kazu Oho Administradór Zumalai Sei Mistériu
Autor-sira ne’ebé família ho populasaun deskonfia envolve ativa no pasiva iha kazu omisídiu agravadu ne’e to’o agora lei la kondena no sira la’o livre hela iha sosiedade.
Ba situasaun ne’e Agência Tatoli, kinta (24/06), halo entrevista ida hos Komandante Polísia Nasionál Timor-Leste (PNTL) Munisípiu Covalima, Superintendente António Maria de Sá, hateten katak autoridade komandu polísia delega ona prosesu kazu omisídiu ne’e ba Polisia Sientífiku Investigasaun Kriminál (PSIK)
“Kazu ita nia Administradór Postu Zumalai agora hosi Ministériu Públiku delega ba PSIK bainhira enkontru ko’alia ho Prokuradór Jerál sesante kona-bá kazu refere . Tanba autór sira lvire hela,” Superintendente António Maria de Sá hateten iha Aldeia Pelet, Suku Lour, Covalima.
Notísia Relevante : Xefe Governu Hato’o Kondolénsia Ba Familía Matebian Administradór Postu Zumalai
Nia hateten, autór sira ne’ebé deskonfia envolve iha kazu ne’e to’o agora seidauk halo detensaun tanba sei hein delegasaun kompeténsia liuhosi mandadu detensaun hosi Ministériu Públiku (MP) mak bele halo detensaun.
“Bainhira la iha mandadu detensaun hosi MP, ami PNTL labele halo kapturasaun ba autór sira,” António Maria de Sá afirma.
Antes ne’e, Komandante Polisia Munisípiu Covalima Superintendente, António Maria de Sá deklara liuhosi diálogu nasionál entre povu no Prezidente Repúblika, Francisco Guterres Lú Olo, iha Covalima, katak kazu ne’e sei iha prosesu investigasaun nia laran.
Jornalista : Celestina Teles
Editór : Francisco Simões
