DILI, 28 juñu 2021 (TATOLI) – Profesór no estudante-sira iha eskola Ensinu Báziku Sentrál (EBC) 30 de agostu, Comoro, Dili, segunda ne’e, halo limpeza iha eskola hodi prepara kondisaun bainhira Ministériu Edukasaun Juventude no Desportu (MEJD) deside re-ativa ensinu aprendizajen prejensiál.
Diretór Eskola EBC 30 de agostu, Filomeno Salsinha, hateten limpeza ne’e rutina atu bele prepara kondisaun, nune’e bainhira MEJD deside re-ativa aula prejensiál, maka eskola nia kondisaun preparadu.
Filomeno Salsinha akresenta katak iha eskola 30 de agostu, rejista profesór no funsionáriu hamutuk na’in-60 no maioria simu ona vasina.
“Ha’u alista ona profesór na’in-30 mak simu ona vasina, ha’u hein lista sira seluk ninia atu ha’u bele aprezenta ba Servisu Edukasaun Munisípiu Dili hodi hein desizaun tuir mai hosi MEJD,” Filomeno Salsinha tenik.
Jornalista : Tomé Amado
Editór : Francisco Simões
