DILI, 28 juñu 2021 (TATOLI)- Populasaun hosi munisípiu rua; Viqueque ho Lautem hamutuk 76.189 simu ona vasina AstraZeneca.
Notísia Relevante : Abitante 7.000-resin iha Covalima simu ona vasina doze daruak
Dadus ne’e kompostu hosi Munisípiu Viqueque hamutuk na’in-9.483 no Munisípiu Lautem na’in-7.706 ne’ebé maka simu ona vasina AstraZeneca doze dahuluk ho doze daruak ba liña frente.
Sentru Saúde Munisípiu Viqueque, segunda ne’e, update númeru populasaun hosi munisípiu Viqueque ne’ebé simu ona vasina hamutuk 8.441 ba doze dahuluk, maibé vasina mak limitadu kompara ho númeru populasaun
Dadus totál vasina hosi Sentru Saúde Munisípiu Viqueque doze daruak ema hamutuk na’in-1.042, doze dahuluk hahú vasina loron 14 juñu 2021 ba ema hamutuk na’in-8.441 no totál hotu na’in-9.483 simu ona vasina AstraZeneca.
Dadus hosi kada postu administrativu, Munisípiu Viqueuqe maka hanesan tuir mai ne’e;
Postu Lacluta simu vasina doze dahuluk mane hamutuk na’in-464 no feto na’in-347, doze daruak liña frente mane na’in-76 no feto na’in-17.
Postu Ossu simu vasina doze dahuluk mane hamutuk na’in-1124 no feto na’in-994, ba doze daruak liña frente mane na’in-123 no feto na’in-32.
Postu Uatucarbau simu vasina doze dahuluk ba mane na’in-263 no feto na’in-118, ba doze daruak liña frente mane na’in-63 no feto na’in-23.
Postu Uatulari simu vasina doze dahuluk ba mane na’in-803 no feto na’in-631, ba doze daruak liña frente mane na’in-145 no feto na’in-45.
Postu Viqueque Vila vasina doze dahuluk ba mane na’in-2017 no feto na’in-1.680, ba doze daruak liña frente mane na’in-383 no feto na’in-135.
“Doze dahuluk, a hahú iha juñu 2021 no mós fó vasina ba doze daruak liña frente sira. Depois iha vasina ne’e, komunidade sira entusiazmu hakarak simu hotu vasina to’o agora dadus populasaun sira ne’ebé simu ona vasina AstraZeneca totál munisípiu Viqueque na’in-9.483,” Diretór Sentru Saúde Munisípiu Viqueque, Francisco de Carvalho hatete Agência Tatoli iha Sentru Saúde munisípiu Viqueque, segunda.
Francisco hatutan, agora dadaun ekipa pesoál saúde kontinua ba terrenu hodi fó vasina ba populasaun no tuku lima lokraik ekipa sira sei hatama tan dadus hodi halo rekapitula dadus sira.
Totál distribui vasina AstraZeneca hosi nasionál ba munisípiu Viqueque hamutuk 773 bial distribui tutan ba sentru saúde postu lima.
Lautem-oan 7.706 mós simu vasina
Hosi sorin seluk, Diretór Servisu Saúde Munisípiu Lautem, Bernardo Amaral Lopes, informa, populasaun 7.706 iha Lautem simu ona vasina AstraZeneca.
“Ita halo lansamentu ba vasina AstraZeneca hahú hosi loron 15 juñu 2021 to’o mai sábadu (26/06) ema 7.706 mak simu ona vasina AstraZeneca,” Bernardo Amaral informa ba Agência Tatoli liuhosi telefónika.
Nia hatutan, komunidade Munisípiu Lautem, alvu ne’ebé atu simu uluk ba vasina refere hamutuk 8.283 ne’ebé daudaun ne’e konta metade mak simu.
Munisípiu Lautém rasik daudaun ne’e komunidade entuziazmu tebes simu vasina refere maibé agora vasina mak la to’o fali ba komunidade.
“Vasina ne’ebé ami simu hosi Nasionál ne’e hamutuk vial 698 ba doze karik bele to’o 8.000, maibé ida-ne’e sei la to’o ba ita-nia komunidade no daudaun ne’e ba ekipa liña frente rasik ema na’in 100-resin seidauk kompleta ba vasina daruak nian,” Bernardo Amaral hateten.
Munisípiu Lautém iha Postu Administrativu lima, hanesan Lospalos, Iliomar, Luro, Tutuala no Lautem no ba Iliomar no Tutuala vasina laiha ona no agora sei kontinua hela maka Lautem, Lospalos no Luro.
Jornalista : Vitorino Lopes da Costa/Arminda Fonseca
Editór : Francisco Simões
