STAE Viqueque rejista eleitór foun 500-resin
VIQUEQUE, 28 juñu 2021 (TATOLI)-Sekretariadu Tékniku Administrasaun Eleitorál (STAE) Munisípiu Viqueque rejista númeru eleitór foun hamutuk 500-resin.
Númeru ne’e STAE Viqueque arrola liuhosi atividade resenseamentu eleitorál ba sidadaun ho idade tinan 17 ne’ebé ba rejista iha STAE Viqueque hosi fulan janeiru to’o maiu 2021.
“Ami sei lansa fila fali atendimentu ba prosesu resenseamentu eleitorál iha loron 01 jullu 2021. Tanba iha fulan hirak ikus ne’e suspende tiha ho situasaun pandemia COVID-19, serka sanitária no konfinamentu obrigatóriu,” Diretór STAE Munisípiu Viqueque, Humberto Fernandes, informa ba Agência Tatoli iha Viqueque, segunda ne’e.
Kona-bá preparasaun rekursu umanu ba atendimentu tuir mai molok eleisaun prezidensiál 2022, nia informa, iha maiu 2021 STAE husi munisípiu 12 inklui RAEOA loke ona vaga hodi prepara rekursu. Depois konkorrente sira tuir ona ezame no eskrita ikus foin sai rezultadu konkorrente sira nian espesiál iha munisípiu Viqueque destakamentu ba postu lima (5) ema hamutuk na’in-14.
“Iha loron 01 jullu 2021, ita sei destaka ona funsionáriu sira ba postu lima hodi simu resenseamentu eleitorál tanba ami mós halo ona karta eskrita ba administradór postu hodi prepara kondisaun ba ami-nia membru sira hodi halo atendimentu ba populasaun,” Humberto Fernandes akresenta.
Rekizitu eleitór foun sira tenke komprova dokumentu legal mak sertidaun batizmu husi igreja no sertidaun RDTL, Billete Identidade no pasaporte ka dokumentu hirak ne’ebé mak bele uza resenseamentu eleitorál.
Servisu lejitimamente STAE Munisípiu Viqueque nian sei foku liu ba levantamentu sentru votasaun-sira hodi halo ajusta ba planu operasionál STAE munisípiu no haruka ba STAE nasionál hodi submete ba Ministériu Administrasaun Estatál (MAE).
Jornalista : Vitorino Lopes da Costa
Editór : Francisco Simões
