DILI, 28 juñu 2021 (TATOLI)—Organizasaun apoia umanitária, World Vision fó apoia materiál eskola ba labarik hamutuk 210, liuhosi Komisaun Nasionál Direitu Labarik, nune’e bele motiva labarik sira hala’o prosesu aprendizajen.
“Sasán hosi Word Vision ba labarik sira ohin ne’e hanesan sasán eskola, kompostu hosi kadernu, lapizeira, kadernu pinta no sasán hanesan máskara no hand senitizer tanba agora tempu COVID-19,” Diretora Nasionál Word Vision Timor-Leste, Migena Shulla, iha edifísiu World Vision, Bidau Santana, segunda ne’e.
Organizasaun mundiál ne’e fó apoiu ba labarik sira ho baze lista hosi Komisaun Nasionál Direitu Labarik.
“Sasán sira ne’e sei fahe ba labarik sira iha Dili de’it pur nesesáriu no sei fahe mós ba labarik sira sira iha munisípiu,” Diretora akresenta.
Iha fatin hanesan, Komisária Komisaun Direitu Labarik, Dinorah Granadeiro, hateten, apoiu ida ne’e ba labarik afetadu dezastre naturál ne’ebé akontese iha 04 abríl.
“Ita husu apoiu ba labarik 250, maibé depende pakote ne’ebé maka sira oferese agora, normalmente ita fahe pakote sira ne’e kada labarik ida pakote ida, hanesan kadernu, lapizeira no seluk tan,” nia hatutan.
Jornalista : Natalino Costa
Editora : Julia Chatarina
