BAUCAU, 29 juñu 2021 (TATOLI)–Xefe suku Tirilolo, postu admistrativu Baucau Villa, munisípiu Baucau, Ricardo Ernesto Belo, informa, distribuisaun Cesta Bázika ohin finaliza ona iha aldeia Lutumutu, suku Tirilolo.
“Suku Tirilolo finaliza ona distribuisaun Cesta Bázika, liuliu iha postu admistrativu Baucau,” Autoridade lokál ne’e informa ba Agência TATOLI, iha ninia knaar fatin, suku Tirilolo, tersa ne’e.
Totál benefisiáriu ne’ebé ohin simu ikus hosi aldeia Lutumutu hamutuk 3.898 ne’ebé rejistradu inklui iha aumentu hosi komunidade balun ne’ebé iha lista reklamasaun hosi aldeia haat seluk hanesan Betulale, Osso-ua, Kaisido no Lialailesu, nune’e totál distribusaun Cesta Bázika ikus nian hamutuk 4.229.
Prosesu distribusaun Cesta Bázika iha suku Tirilolo jeralmente la’o di’ak no ohin finaliza, ne’ebé akonpanã mós ho ekipa observadór hosi Ministériu Koordenadór Asuntu Ekonómiku (MKAE), Ministériu Turizmu Komérsiu no Indústria (MTKI) inklui Admistradór postu Baucau villa.
Produtu Cesta Bázika ne’ebé distribui iha suku Tirilolo mak hanesan, mantolun, foos, mina, susuben, sabaun, deterjente, kafé, masin, masin-midar, fore-kele, batar-ikis, trigu, koto, hand sanitizer inklui nesesidade bazika seluk.
Tuir dadus, populasaun iha suku Tirilolo hamutuk 9.789, kompostu hosi aldeia neen hanesan Betulale ho totál populasaun 2.980, Caisido 849, Lialailesu 728, Lutumutu 3.898, Osso-ua 768, Parlamentu 566, hosi uma-kain 1.702.
Jornalista : Natalino Belo
Editora : Julia Chatarina
