Populasaun ladún trata dokumentu iha DMCSN
VIQUEQUE, 29 juñu 2021 (TATOLI)- Diretór Diresaun Munisipál Konservatoria Servisu no Notariadu (DMCSN-sigla portugés), Rozeiro da Costa, informa durante Governu aplika Estadu Emerjénsia no Serka Sanitária (EE-SS) halo populasaun ladún mai trata dokumentu iha DMCSN.
“Komunidade ladún mai trata dokumentu hanesan Billete Identidade, Sertidaun Nascimento, Sertidaun Kazamentu, Sertidaun Óbitu no rejistu kriminál,” Rozeiro da Costa hateten ba Agência Tatoli iha edifísiu DMCSN, Viqueque, tersa ne’e.
Rozerio hatutan, populasaun sira hakarak mai trata dokumentu, maibé regra prevensaun COVID-19 nian hosi saúde mundiál no bandu ema labele la’o ba mai atu evita propagasaun COVID-19 iha Viqueque.
“Foin lalais governu hakotu serka sanitária iha Munisípiu Viqueque iha fulan juñu ita-nia populasaun komesa mai trata dokumentu, maibé ema labarak dala ruma loron ida ema na’in-lima (5) de’it tanba sira mós ta’uk COVID-19,” nia hateten.
Nia husu ba populasaun ne’ebé mai trata dokumentu iha DMCSN atu kontinua kumpre regra prevensaun ba COVID-19 hanesan uza máskara, fase-liman ho sabaun beibeik ka uza dezinfetante no distánsia fiziku.
Jornalista : Vitorino Lopes da Costa
Editór : Francisco Simões
