Postu saúde Ogues implementa programa saúde na família
COVALIMA, 29 juñu 2021 (TATOLI)-Postu saúde Ogues, Postu Administrativu Maucatar, Munisípiu Covalima, implementa ona programa saúde na família iha Suku Belecasac, Holpilat ho Matai.
Programa saúde na família lansa nanis ona iha tinan 2015, ho nia baze orientasaun destaka ekipa médika sira ba uma-kain ida-idak (agregadu familiár sira) iha país ne’e, transforma daudaun kuidadu saúde primáriu iha Timor-Leste. Ekipa sira ne’e konstitui hosi médiku ida, parteira ida no enfermeiru ida, ne’ebé sira bele avalia estadu saúde no nesesidade sira apoiu klíniku ba membru sira hotu iha uma-kain ida-idak.
“Falta Suku Ogues de’it maka ami seidauk implementa programa saúde na família, maibé fulan oin ami sei hala’o fali iha Suku Ogues,” responsavel Postu Saúde Ogues, Carlos da Cunha Moniz informa ba Agência Tatoli iha Covalima, tersa ne’e.
Durante implementa programa saúde na família, pesoál saúde deteta moras Tuberkuloze, azma IRA (Infesaun Respiratóriu Aguda), pneumonia ho tensaun.
Abitante 324 iha Ogues simu vasina dose dahuluk
Abitante ho idade tinan 18 to’o tinan 65 hamutuk na’in-324 iha Postu Saúde Ogues simu ona vasina dose dahuluk.
Biban ne’e, abitante na’in-haat (4) ne’ebé konsidera hanesan ekipa liña frente simu mós vasina doze daruak nian.
Tuir dadus Munisípiu Covalima nian hatudu katak abitante 7.000 maka simu ona vasina AstraZeneca ba doze daruak hodi kontra pandemia COVID-19.
Jornalista : Celestina Teles
Editór : Francisco Simões
